Lourens an Ryna Arriveer

13 Julie 2017. Donderdag.

Marietjie se Ma is vandag oorlede. Ons innige simpatie vir haar en die familie. 

Die GPS mislei vir Ryna en Lourens en met seer voete kom hulle uiteindelik 20:00 aan by Maja.

Ryna en Lourens kom uiteindelik aan

Lourens stap …

… maar Ryna gallop!

Ons sit op die dek omsingel deur bagasie toe die Griekse stapleier, Thanasis Pantes, daar opdaag. Hy is dié een wat die du Plessis’s op twee staptoere gelei het in 2015 en het net gekom vir ’n hallo-sê. Ons praat land en sand, hy gee goeie raad, maar Maja is nie geskik vir al die baaie wat hy aanbeveel nie.

Die aand eet ons sommer ’n ligte vingerete. Daar is ’n moerse party by die Universiteit net oorkant ons wat eers 06:00 die volgende oggend opgehou het. Dis die verskriklikste musiek ooit, maar Lourens en Ryna slaap deur dit alles en nogal op die dek!

Pieter en Zané

Pieter en Zané kom by Maja aan net om te hoor dat Marietjie moet huis toe gaan om haar Ma te versorg en dat hulle Marietjie se groot skoene op kort kennisgewing en met minimale ervaring moet vul. Hulle het dit uitstekend reggekry al was Zané soms baie angstig.

Dankie, julle vir julle bydrae en ondersteuning. Ons hoop julle het die ervaring geniet.

Zané

Zané

Beste Ervaring:

Die adrenalien van ’n suksesvolle anker! Maak nie saak hoe die anker gebruik is nie. Daardie verligting as die ketting styf trek is uniek! Ek het gevoel elke biershandie is verdien!

'n Baie suksesvolle anker by Pythos Baai

Beste Plek:

Peristera Baai! Dit was onbeskryflik mooi. En die enkele huisies wat daar gebou is, het net die Griekse atmosfeer aangehelp. Dis natuurlik ook die plek waar ons die mooiste skulpskatte kon kry. Ek sal ’n week daar kan bly!

Peristera Baai

Pieter

Pieter

Beste Ervaring: 

Die oomblik toe die vorige, persoonlike seilrekord (’n skamele 6.3 knope), verpletter word met ’n nuwe algehele rekord van 7.5 knope! Nog beter egter, was toe dit vir lank genoeg gehandhaaf kon word, vir die GPS om dit inderdaad te registreer (en die rekord dus op rekord geplaas kon word!)

Kom 7.5 knope! Kom!

Beste Plek: 

Órmos Planitis! Afgeleë, afgesonder en met selfs die potensiaal om jou binne te hou. Die opwinding van ’n redelike nou en vlak ingang; amper asof mens bietjie deur die eiland ingesluk word. Dan natuurlik ook die merkwaardige vermoë vir aanpasbaarheid van die eiland se boerbokke, om met soutwater in hul waterbehoefte te kan voorsien.

Aanpasbare bok

Volos. Pieter en Zané Groet.

13 Julie 2017. Donderdag.

Zané en Pieter neem die 09:00 bus na Athene. Op pad terug van die busstasie gaan ek weer LIDL toe vir nog proviand. Terug op ’n dodelik warm boot is dit verder skrop en polish.

Swaar gelaai

Trek skoene aan

Wag vir bus

 Koebaai julle!

Volos.

12 Julie 2017. Woensdag. 

Pythou Baai tot Volos

Ek gaan vir oulaas land toe om ’n paar foto’s te neem.

Kleurvolle Maja

Pieter en Zané se laaste oggend op anker.

Maja

Volos, 14.9 myl, is ons eindbestemming vir vandag en ook Pieter en Zané se eindbestemming vir hulle Maja ervaring.

Daar is geen wind en ons motor heelpad na Volos. Ons soek plek, maar almal is “permanent moorings” behalwe langs die breekwater waar daar geen krag of water aangelê is nie. Noodgedwonge maak ons daar “alongside” vas. Die tekort aan krag en water is ’n probleem, want Maja moet skoon kom vir môre se nuwe gaste. Na ’n rukkie besluit ek om kans te vat en ons gaan maak vas aan ’n relatiewe oop stuk van die kaai. Hou maar duim vas dis niemand se plek nie.

Eet laaste van die oorskiet vir middagete.

Pieter en Zane gaan koop buskaartjies en ek gaan soek vir ’n krag en water kaart. Almal is suksesvol in hulle pogings. Archie begin vir Maja skoon suig en die laaste wasgoed te was.

Later ontdek ek ’n LIDL op Google Maps, 2.1 km weg, en is onmiddellik soontoe om proviand te koop. Ek kom terug met ’n rugsak vol bier – plus ’n paar ander eetgoedjies. Môre sal ons groot aankope doen met Ryna en Lourens.

Pieter en Zané loop Volos plat agter 'n yskasmagneet aan en is uiteindelik suksesvol. Hulle ontdek ook ook oulike restaurantjie wat net Grieks op die spyskaart het en 'n entjie uit die toeriste area is. Ek is lus vir “mixed grill” en hierdie lyk soos net die plek vir die dankie-sê ete. Toe dit donker raak, stap ons soontoe en eet ’n wonderlike ete. Daar is 5 tipes vleisgeregte en baie skyfies. Ons eet ons knuppeldik. Dankie julle. Net jammer Marietjie kon nie hier wees nie.

Vleis vir Afrika

Zané met ons kelner en 'n vriend

Pythou Eiland. Pythou Baai.

11 Julie 2017. Dinsdag.

Koukounaries Baai na Pythou Baai

Vandag vaar ons in die Padasitikos Golf in op pad na Volos, waar Pieter en Zané gaan afklim. Dis 23.6 myl en ons trek vroeg weg uit ’n stil Koukounaries Baai na Pythou Baai op Pythou Eiland. Daar is nie genoeg wind vir seil nie, maar ons motorseil totdat die wind heeltemal gaan lê.

Vroegoggend visserman

Marmer gwarrie

Spieëlgladde see

 

Pythou Baai is baie klein en word as ’n “settled weather” ankerplek beskryf. Wel, ons het “settled weather” en ons besluit om oor te slaap. Ons probeer anker gooi, maar die baai is klein, sandkolle is min, seegras is baie, die bodem is baie steil en na twee anker pogings besluit ons om “line ashore” te neem. Pieter en Zané doen hulle dinge en vas is ons.

Na “cold beverages” gaan verken Pieter en Zané die onderwater rotse en riwwe waar Zané nog “treasures” op tel. Dit 'n baie mooi snorkelplek.  Dis net ons, 'n paar kampeerders (wat met 'n seiljag aangekom het) en duisende seemeeus op die eiland. Die seemeeus is nooit stil nie en skreeu dag en nag.

Later gaan stap Zané en ek na die hoogste punt op die eiland om foto’s te neem. Dit maak die seemeeue baie ongelukkig en dit raas vir die vale.

Maja alleen in Pythou Baai

Zané op haar mishoop

Aandete is aartappels met 'n verskeidenheid vulsels. Dis Pieter en Zané se laaste anker.

 

Skiathos Eiland. Koukounaries Baai.

10 Julie 2017. Maandag.

Patitiri tot Koukounaries Baai

Na ’n lang stap om vars brood te koop, trek ons weg vir die lang vaart na Koukounaries Baai, 25.1 myl. Ons kon darem vir 1h25min seil. ’n Klein skool dolfyne swem in die vêrte, maar hulle is besig om te eet en kom nie naby ons nie.

Kry maklik ankerplek in NW hoek van die baai en die anker byt op die eerste probeerslag. Swem en sweet is ons voorland op Maja tot dit effens koeler is. Daar is heeltyd ski-bote wat mense op tjoeps en waterwurms rondtrek. Dis ’n bedrywige plek dié.

Maja in die verte

Ons gaan later in die dag land toe. Dis ’n laaaaang strand vol sambrele, banke en mense wat die strand en die see geniet, maar verder is daar niks baie interessant nie. Ons loop tot die klein hawetjie en terug.

Koukounaries Strand

Klein hawetjie

Zané oordink dinge

Eet pasta, wors en sampioene vir aandete.