Turkye. Mosko, nee Çamlik Köyü.

28 Augustus 2014.  Donderdag.

Badlemi tot Çamlik Köyü via Mosko

Ons wikkel vroeg, terwyl Gus nog sluimer. 06:30, net toe dit lig word, vertrek ons.

Wikkel vroeg

Ons moet eers uit die noordelike uitgang kom, sonder om in die vlak te beland. Ons kom ongeskonde deur en vaar na Mosko (39°20.043 N, 26°36.923 O), 23 myl.

Ons vaar, met Gus liggies van voor. Poseidon voorspel dat hy later sterk gaan waai en ons is nie lus vir sterk wind van voor nie. Dus, vroegvaar was ons voorland. Oor die groot oop see, gaan ons noord, met 'n nie te kwaai wind van voor. Dit is interessant, die een eiland is bar soos Namibië terwyl sy buurman ruig en groen is soos die Natalse Suidkus. In die verte lê die Griekse eiland, Lesvos.

Eenkant bar ...

... anderkant groen

Lesvos in die verte

Ons kom by Mosko aan en soek ankerplek. Ons anker en jou waarlik, die anker byt in die seegras. Ek moes toe al lont geruik het. Archie gebruik deesdae 'n "anchor watch app" op die selfoon. Jy druk 'n knop as jy ankergooi en sleutel 'n radius in waarin Maja kan rondbeweeg. As die pyltjie (wat Maja is) dan buite die sirkel beweeg, beteken dit dat die anker sleep en dan lui 'n alarm.

Mosko

'n Ding kom op die water aangejaag. Met 'n vreeslike spoed. Ons kyk en dis sowaar 'n seevliegtuig wat op die water geland het. Hy meer vas aan 'n boei en hulle laai mense op by die vakansie-oord.

Seevliegtuig

Toe begin Gus waai. Ek knip 'n uiltjie, want ek weet vannag is seker nagwaak. Ek word wreed uit droomland geruk deur die alarm van die ankerwag wat lui. Ons kyk buite en sien dat ons al 'n ent gedryf het. Die anker sleep beslis.

Ek trek op en bring 'n hele seetuin saam. Archie maak die anker skoon en ons gooi weer. Die anker sleep so, dat ons omtrent die bodem omploeg. Dié keer is die seetuin nog groter. Archie maak weer skoon.

Waarheen nou? Hier kan ons nie in die wind bly nie. Ons anker sal nooit byt nie. "Voorwaarts, Christen stryders", en ons vaar verder, na 'n volgende ankerplek. Gus geniet hom gate uit.

Ons moet nou deur 'n vlak kanaal vaar in die baai van Ayvalik. Dis vlak water en bakens en wind en kophou. Wie het gesê seil is maklik?

Kanaal deur die vlaktes

Benoud kom ons deur die kanaal en vaar verby die dorpie, Alibey, na Çamlik Köyü (39°17.348 N, 26°39.994 O), 6 myl verder, 'n beskutte baai teen die Meltemi. Daar swem ook  'n reuse bloubul van 'n jellievis.

Çamlik Köyü

Die bloubul is 'n jellievis

Die see is kalm in die baai, maar Gus val ons met mening aan as hy oor die berg in die see val. Dis die een windvlaag na die ander.

Die aand maak ek nie 'n oog toe nie.

Turkye. Bademli Baai.

27 Augustus 2014.  Woensdag.

Çandarli tot Bademli

Bademli, (39°00.946N, 26°48.289 O), is 'n baai met twee ingange, 'n nou, smal een in die noorde en 'n nouer, smaller een in die suide. Ons het net 12.9 myl om te vaar, dan is ons daar. Die Turkse kuslyn is regtig mooi. Dis kurwes berge en bloue waters en mense wat uitgelate in die see baljaar.

Blou water

Ons seil vir 'n ruk, totdat ons om die hoek gaan en wind van voor kry. 

Om die hoek

Ons kom by nouer suidelike ingang en dis omtrent meet en pas om deur te kom. Die kanaal is smal omdat daar rotse en vlak plekke aan albei kante is wat jy moet vermy.

Suidelike ingang

Ons deel die beskutte baai met drie ander jagte. Vir die eerste keer in 'n lang tyd, sien ons weer olyfbome. Hulle staan as't ware met hulle voete in die see.

Bademli Baai

Olyfboord

Die rustigheid van die aand kom pluk aan ons siele en ons gee ons oor aan die voleindiging van die dag.

Voleindiging