April 2023
Ons het mos hoeka 'n plek in Skopelos gesoek met 'n tuin. Dis hoekom ons Sue se huis wou gekoop het. Maar nou het ons 'n eienaardige driehoek tuin met baie swak grond waarop net geharde onkruid groei. Én jy moet met trappe soontoe gaan. Dit moet nou ons tuin word.
Archie hou van 'n uitdaging en begin dadelik met die tuingereedskap wat ons in Turkye gekoop het, met mening in die oerwoud woel en werfskaf. Die bossies is amper net so hoog soos hy. Die grond is so hard soos rots.
Stadig maar seker vorder hy. Beddings word gemaak en ons gaan haal wilde irisse langs die pad uit en plant dit in die tuin. Nou is daar darem iets groen in die tuin.
Toe ons terug gaan na Suid-Afrika, vra ons vir Moeder Natuur om ons plante nat te gooi terwyl ons weg is.
Toe ons in Maart 2023 terugkom, leef al ons potplante nog, die malvas en hiasinte blom. Maar daai bossies! Dis weer hemelhoog. Archie spring in en uit is die bossies.
Ek begin saadjies te saai. Dis van my ma se blomme (tipe zinnia), Afrikaner en chillies, tamaties, roket, dille basil, baby marrows en spinasie. Dis nog koud en nat. Niemand anders op Skopelos saai nie. Dis net die realistiese ekke wat ewe optimisties al wat 'n saadjie saai.
Ek koop blombakke en ons koop baie kompos om die grond te verryk. Dis vir ons 'n snaakse konsep dat hier so min grond is. Bogrond (top soil) is nie eers te koop nie. Maar so stoei ons maar in die tuin. Die plantjies kom op en toe gaan ons op 'n kritieke tyd in die lewe van plantjies Italië en Malta toe. Anthony versorg baie benoud ons plantjies. Sommiges lyk maar bedremmeld in die blombeddings met klei-os grond.
Die kruie in die vensterbank lyk darem mooi.
 |
| Ontbossing |
 |
| Beddings |
 |
| Plant druiwe |
 |
| Plantjies |
 |
| Suurlemoenboom |
 |
| Rose, irisse en veldblomme |
 |
| Malva |
 |
| Kruie in kombuisvenster |
No comments:
Post a Comment