Tuesday, November 21, 2023

Marchie's Place se muur

April 2023

So staan ons ou geel huisie langs die pad. Sommer so half in die pad. Oop en bloot. Kaal, onafgerond. Ek kyk hom so en dink by myself, in Suid-Afrika het ons MURE om die huis. Hoë mure! Om die skelms uit te hou. Om te sê:"Dis ons huis." Nou ja, ons sal 'n plan moet maak. En so begin projek "Marchie se muur".


Ons moet eers 'n permit kry om te bou. Hierdie dorp is 'n historiese monument. Jy kan nie sommer bou wat jy wil nie. Die stadsingeneur moet kom kyk en 'n boupermit gee wat 'n jaar geldig is. Dit word gedoen en ons mag bou.

Andreas, 'n Albaniër kom doen die bouwerk. Hy maak dagha aan, lê stene en die muur vorder. Hy pleister en maak gate waar die water kan uitloop.Die Griekse bure is ene belangstelling oor ons muur. Almal kyk en die komplemente stroom in. Én die muur is nog nie eers klaar nie.

Andreas bou laat dit bars.  Die pilare lyk vir my te hoog en hy moet weer afbreuk. Toe moet die verf gekies word. Natuurlik stem ek en Archie nie saam oor die kleur nie. Ons vra die familie se mening oor die kleurskema. Voorstelle stroom in. Sommige baie interessant. En ons kies die kleur.

Ons koop die verf by Archie se gunsteling hardewarewinkel, Regas en siedaar! Andreas verf die mure een skakering ligter geel as die huis se kleur en die afronding en skakering donkerder as die groen van die voordeur en hortjies. En dit lyk te pragtig. Toe stroom die komplemente éérs in. 

Marchie's Place het nou 'n muur (sonder 'n hek).  Die naambord pryk spoggerig en trots teen die muur. (Dankie Laaina) Vurige rooi malvas is in die vensterbanke en in die hangmandjie. Gesiggies loer met hulle vrolike gevreetjies na die pad. Die olyfboom (wat Archie se verjaarsdaggeskenk van Sim en Lindsey was), staan by die voordeur. Ons hang 'n skulp- windklok op wat vir ons vertel wanneer Gus waai.

Wat 'n vrolike en gelukkige huis is die Marchie's Place. Ek en Archie kyk met trots na ons nuwe woonplek.

Muurlose, blomlose, naambordlose huis

Stene gelê

Top van muur word gegiet

Begin pleister

Reg vir verf

Muur en naambord

Muur en naambord

Eindproduk