16 en 17 Julie. Maandag en Dinsdag.
 |
| Skala Astipalaia tot Maltezana Baai |
Ag maar Gus se gewaai maak my mismoedig! Ons is nou al vyf dae hier by Skala, maar ophou is verniet. Vlaag na vlaag hardloop van die berg af en val ons aan Die anker hou. Ons besluit ons wil net van plek verander en vaar na Maltezana,4.7 myl. Volgens die boek is daar goeie skuiling en houkrag met min rukwinde.
Al die baie toue word losgemaak en Archie is omtrent natgesweet van al die werk. Ons trek die anker op en vaar uit die mooi hawe van Skala wat ons nou al so goed ken. Maar ek besef toe eers ons hawe is baie beskerm teen Gus. Op die see waai hy erg. Sommer gou is ons by Skhinounda Baai, naby Maltezane. Daar is een boot op anker wat daar skuil.
Archie tru ek ek gooi anker. Byt is verniet. Net seegras! Toe ons weer gooi, skree die Duitsets hulle het 80m ankerketting uit. Ons kan nie daar gooi nie. My magtig! 80m in 5m water. Ek skree vir haar terug en vra of hulle mal is! Ons gooi daai anker drie keer en elke keer trek ek 'n seetuin op. En die blêrrie boek sê goeie houkrag. Hy lieg! Ek vloek effens. Ons gee die baai vir die Duitsers. Met hulle 80m ankerketting, neem hulle die hele baai in beslag en ons vaar na Maltezana. Wat 'n fout was dit om vir Skala te verlaat en hierheen te kom! Maar spyt kom altyd te laat. Gooi anker en dit byt dadelik. Toe is ons vas.
 |
| Die Duitsers in Skhinounda Baai |
 |
| Maltezana |
 |
| Vroegoggend Skala Astipalaia vanaf Maltezana |
Gus waai al die pad. Dwarsdeur die dag. Dwarsdeur die nag. En net om my siel verder te versondg, gaan die ankerfoon se alarm af. Ons hou die saak dop, maar dit was 'n vals alarm. Maar dink jy ek kan toe slaap! Nee, lê oop-oog in die bed en luister hoe Gus waai. Hy vreet my hart en siel op met sy gewaai en lawaai.
Genadiglik gaan die nag verby. Ons gaan eers Woensdag kruis, want dit gee die see kans om te gaan lê. Vir die eerste keer in sewe dae is daar effense lewe op die water. Party manne pak hulle tog aan.
Môre is dit ons beurt. Vandag is Gus baie stiller hier by ons en my gemoed begin lig. Ons hoop vir die beste vir ons kruising.
