24 Mei 2023. Woensdag.
Vandag gaan 'n lang dag wees. Ons klim bus 42 en vertrek na Cirkewwa, waar ons die boot na Comino moet kry. Na 'n baie lang rit kom ons daar en is net betyds om die spoedboot na Comino Eiland te vat.
Daar is 25 mense op die boot en die kaptein dink dis Kyalami. Ons trek daar weg, dis punt in die wind en jou asem slaan weg. Die boot se neus is doer in die lug en die water spat. Dan maak die kaptein elke nou en dan 'n onnodige draai en almal val laggend rond en gil. Dan klou jy maar vas. Die musiek blêr op die boot. Sowat van spoed en opwinding op die see het ek lanklaas beleef. Heerlik!
Deel van die vaart is dat hy 'n draai by die grotte maak. Dis pragtig. Die water blousel-blou. Hy vaar stadig daar verby en gee almal kans om foto's te neem. Wat 'n bonus om die seegrotte van so naby te sien. Toe beveel hy dat ons weer sit en ons spoed punt in die wind voort.
 |
| Ons spoedboot |
 |
| Water spat |
 |
| Grotte |
 |
| Grotte |
 |
| Blousel-blou |
Die "Blue Lagoon" se blou water slaan jou asem weg. Dit is behoorlik pragtig. Dit lyk soos daai mooi baaie wat jy soms in Turkye en Griekeland kry. En skielik verlang ek na Maja. Ons het saam met haar talle kere in sukke baaie geanker. Die "Blue Lagoon" kruip sommer in my hart.
Dis nog lekker stil in Comino. Die skare is nog nie hier nie. Te vroeg. Ons stap rond en later eet ons die toeboordjie op 'n rots en kyk na die blou see. 'n Stukkie van my vleis val op die rots en ons verkyk ons aan die akkedisse wat 'n feesmaal het. Hulle lek hulle lippe af, regtig.
 |
| Blue Lagoon |
 |
| Kristalhelder |
 |
| Stap langs die see |
 |
| Seilboot |
 |
| Kyk na akkedis |
 |
| Akkedis |
Later kom die skares en die plek verloor sy sjarme. Dis net boude en lywe oral, op die strand, op die die paadjies, by die stalletjies, oral. Almal drink drankies uit pynappels en moer dan die strooitjies en pynappels net daar neer. Maar ek moet sê, daai pynappeldrankies lyk heerlik.
 |
| Boude |
 |
| Skare |
 |
| Pynappeldrankie |
Toe klim ons weer in die spoedboot en jaag na Gozo Eiland. Daar is 'n pragtie kerk. Een ding is seker. Hierdie Malta het mooi kerke orals.
Die alewige gewag vir busse put my uit. Ons wag vir 'n bus na die citadel. Vandaar wag ons vir die bus na Djerwa, waar die rotsformasies is. Die rotsmorfmasies is rotsformasies. Ons soek na die wow, maar die wow is weggewaai in die wind. Ons wag weer vir die bus en ry terug na die citidel.
Nou is dit onweer en die wind waai. Ons gaan stap nie in die dorp rond nie. Ons klim die bus na die veerboothawe. Ons moet behoorlik vinnig loop om die veerboot betyds te kry en vaar terug na Malta. Ons wag weer vir 'n bus en ry moeg terug huis toe.
Maar dit was 'n lang en interessante dag. Die "Blue Lagoon" was natuurlik my hoogtepunt. Én die spoedbootvaart!
 |
| Mooi kerk |
 |
| Dwerja se rotse |
 |
| Dwerja se "fungus rock" |
 |
| Dwerja se baai |
 |
| Dwerja se baai |
