4 en 5 September 2016. Sondag en Maandag.
 |
| Bayindir tot Pölemos Bükü |
Tot siens Kaş! Ons was drie dae in
die omgewing en nou is dit tyd om verder te gaan. Die nuwe bestemming is Kekova
Roads en wel Pölemos Bükü,15.3 myl. Die anker het oudergewoonte weer goed gebyt
en weg is ons.
 |
| Op pad |
Gus waai net liggies en van seil is
daar nie sprake nie. Die kaptein se hart hunker na ’n bietjie seil, maar ek is
heel tevrede met die prrr van Maja. Archie vat ons sekuur deur die vlak en die
rotse en die groot baai lê voor ons. Ankerplek is nie hier ’n probleem nie. Ons
gooi lekker vlak anker en hy byt behoorlik.
 |
| Pölemos Bükü ankerplek |
Van die baai kan jy na die antieke stad van
Aperlae gaan kyk. Ons maak toe net so. Ons roei kant toe en vat die pad na die
ruïnes.
 |
| Asar Bükü |
Die kaai en hawe se strate is nou
onder water. Heelwat van die ruines is nog onder die water sigbaar. Dele van
die akropolis, stadsmure en die Nekropolis is nog te sien. Die pad boontoe is
op en warm.
 |
| Onderwater ruïnes |
 |
| Stadsmure |
Hier is ook baie sarkofae hier te
vind. ’n Sarkofaag is ’n doodskis wat van klip gemaak is met beeldhouwerk of
inskripsies daarop. Blykbaar was dit in daardie tyd ’n goedkoper opsie om ’n doodskis
van klip te maak en die mense van daai tyd het gedink dat die sarkofaag eet die
dooies, omdat as hulle later gaan kyk het, het hulle net bene gesien (volgens
Elize se toergids in Turkye).
 |
| Archie by sarkofaag |
 |
| Ek by onderwater sarkofaag |
Hierdie is ook deel van die Lycian Way
staproete en hier is slaapplek vir die stappers. Hoe graag sou ek nie die
staproete wou stap nie!
 |
| Stappers oornaghut |
Op pad terug loop ons mense raak wat
by Patmos Eiland langs ons op die dorpskaai gestaan het. Hulle is van Engeland
en saam met hulle is mense van Nieu-Zealand. Hulle kom ook na die ruïnes kyk.
Ons drink ’n bier by die restaurant
en gaan terug na Maja. Ons sit nog so lekker op die dek, toe kom Kevin en Dee
van Engeland met hul dinghie na ons toe en nooi ons uit vir ete by die
restaurant die aand. Ons aanvaar die uitnodiging dadelik.
 |
| Restaurant pier |
Dis al amper donker toe ons 19:30
met Dinkie restaurant toe ry. Ons gesels en kuier heerlik saam met die gawe
mense. Op die spyskaart is frikkadelle, slaai en groente. Ons eet heerlik en
kuier en lag en gesels.
 |
| Larry, Lee, Kevin, Dee, ek en Archie |
Na die ete ry ons in die duisternis terug na ons
jagte. Ek lig op Maja met ’n flits en ons kry darem ons huis. Wat ’n heerlike
aand!
 |
| Oggendskoot - Pölemos Bükü |
