Kuluyu Bükü. Salige Sondag.

24 Mei 2015.

Kuruca Bükü tot Kuluyu Bükü

Dis darem regtig ’n voorreg om in so ’n pragtige gebied te seil. Omring deur berge, ongerep, deursigtige water, heerlike weer. Ons hoop dit bly so, want Leon en Dirk sluit 3 Junie by ons aan. Vandag is ons weer op pad na ’n idilliese plek, soos die boek dit beskryf. En die plek se naam is Kuluyu Bükü, 36°47.636 N, 28°04.876 O en dis 11.2 myl se vaar. Ons seil maar min, want die wind is min en ons moet die motor gebruik om ons huisbatterye te laai. Die batterye is op hulle laaste. Hulle moet nog net hou tot in Marmaris, waar ons nuwes gaan koop. Ons beplan om 2 Junie in Marmaris te wees.

Oggendskoot - Hisarönü Körfezi

Ons bereik ons baai en dis pragtig. ’n Mengel kleure van skakerings groen en blou. Ons kry alles reg vir die anker. Die boek sê dis een van daai ankerplekke waar jy  lang toue land toe vat om Maja aan twee bome te gaan vasmaak. Dis ’n moeilike ding om te doen vir net twee mense. Archie neem posisie in en tru. Ek gooi anker en toets hom. Archie tru nog nader aan die land, terwyl ek die dieptemeter moet dophou. Toe ons naby genoeg is, neem ek die helm oor en Archie duik weer sierlik in en swem vir die vale. Hy bereik die boom sonder voorval en maak die tou aan die boom vas. Vas en veilig. En wat gebeur? Al die ander seiljagte wat hier kom, anker sommer net, sonder ’n landtou, losdraaiend!

Landtou

Kuluyu Bükü

Hulle anker!

Ons sit langbeen op die dek en laat die Sondag oor ons spoel. Die voëltjies sing en spring in die bome rond. Die uitsig rondom is spesiaal. Op die oewer is enkele gesinne besig om piekniek te hou. Kinderlaggies klink oral op. Dis salige Sondag. Dis ook toe tyd vir ’n salige lafenis in die see. Dis koel en verfrissend.

Ons gaan stap en geniet die visuele genot wat aan ons uitgedeel is. My suster Laaina (bynaam) verjaar vandag en ek wens ek kon vir haar ’n stukkie uitsig as verjaarsdaggeskenk gee. Geluk Laaina!

In die verte sien ons klein ou selbootjies wat besig is met 'n regatta. Dit lyk amper soos vlinders of naaldekokers hier van bo af.

Maja in Kuluyu Bükü - uitsig vir Laaina

Bababoot regatta

Dis Sondag. Dis tyd vir Sondagkos. Vanaand eet ons groenboontjiebredie.

Groenboontjiebredie

Kuruca Bükü.

23 Mei 2015.

Datça tot Kuruca Bükü

Ons vertrek 8:00 uit Datça en vaar verby ’n ligtoring wat jou waarsku teen die rotse in die see. Hier in die Aegean See kruip die rotse mos in die middel van die see net onder die watervlak weg sodat ’n onskuldige seiljag haar kiel daarteen kan stamp. So, ons is altyd op die uitkyk na waarskuwingstekens in die see, bestudeer die kaart en lees die boek.

Ligtoring op Uzunca Eiland

Berge

Kormorante

Kuruca Bükü, 36°45.352 N, 27°53.748 O, 13 myl, waarheen ons vandag op pad is, is ’n groot baai in die Hisarönü Körfezi. Ons soek ankerplek, maar ons kry niks wat in ons smaak val nie. Dan is dit te diep, dan is die vlak kant te naby. As die diepte reg is, sien ek net seegras. Ons vaar na die ander kant van die baai, kry ’n lekker sandkol en gooi daai anker. En siedaar! Ons is stewig geanker. Dit is warm hier in Turkye en ons swem gereeld om af te koel. My suster, Elize, sou die swemmery vreeslik geniet het.

Kuruca Bükü

Kuruca is ’n vakansiedorp wat baie gewild onder senior burgers is. Blykbaar was daar in die begin van 1970’s sewe ou en afgeleefde donkies daar losgelaat. Toe die konstruksiespan twee jaar later kom om die vakansiedorp te bou, vind hulle sowaar 28 donkies. Sowat van vrugbaarheid! Wat Kuruca kan doen vir die vrugbaarheid van 'n donkie ... Die oumense wat hier kom bly, moet oppas!

Die baai verander laatmiddag in ’n bad soutwater. Daar is beswaarlik ’n rimpel. Al die seiljagte, agt van ons, staan sierlik stil, snoete almal dieselfde rigting. Dis hoe ek van die baaie hou, spieëlglad. 

Spieëlglad

Ek kook vandag groot. Dan hou daardie kos vir vyf tot ses dae, hang af hoe honger ons is. Op die spyskaart is lamskerrie met murgpampoentjies en die ander helfde van die lam word ’n groenboontjiebredie. My mond water en Archie steel kos uit die pot. 

Lamskerrie

Toe die son dit waag om te sak, val ons weg aan die lamskerrie! En is dit lekker!