Bozburun

27 tot 29 Julie 2002. Woensdag tot Vrydag.

Vandag is dit net 'n hanetree na Bozburun, 6.6 myl. Ons wil sommer twee dae daar bly. (Ons bly toe drie dae)

Die baai is groot en baie diep op plekke. Ons kry plek in die baai wat baie vêr van die dorpie af is. Ons gooi in 13m anker en vas is ons op 'n modderbodem. Gus waai baie liggies tot gladnie. Dis warm. Maar dis die lekker van anker. Swem. Die seetemperatuur is 27°C. Heerlik, amper te warm. Jy laat jou bene dieper afhang in die see om die koeler water te kry.

Die tweede dag wag ons vir jagte wat nader aan die dorp geanker is om te vertrek. Nie lank nie en twee jagte vertrek. Ons trek anker op en gaan gooi in die baai naby die dorp anker.

Ons roei land toe. Bozburun is 'n mooi Turkse dorpie. Baie restaurante en ook toeriste winkeltjies. Dan is daar ook darem supermark en paar ander nuttige winkels. Ons koop voorrade en stap rustig rond. Dis lekker om vaste grond onder my voete hê. Ons roei terug in Dinkie en dis so warm, dat ons dadelik swem. 

Hierdie is soos die goeie ou dae toe Gus nie alewig gewaai het nie. Heerlik. Bozburun is bobaas.

Bozburun se ingang

Bozburun ankerplek

Moskee

Bozburun

Op die kaai met Maja in agtergrond

Hawe

Roei land toe

"Bozburun by night"

Söğüt Limanı

26 Julie 2002.  Dinsdag.

Nou moet ons hier uitkom. Die gulet het ons vas parkeer. Ons en Sugar Baby besluit ons gaan dieselfde tyd ry. Ly nou nog aan skok dat die varknek ons anker losgemaak het. Ek het nie eers genoem dat ons toe ons gister het van die land af teruggekom het, gesien dat Maja se snoet meer as gewoonlik heen en weer geswaai het nie. Dis omdat sy nie geanker was nie!

Ons laat weet die kaptein ons wil oor 15 minute vertrek. Natuurlik wag hy langer as 15 minute en sluit toe sy enjin aan. Hy maak die lang landtou aan ons kant los dat die gulet effens na die ander kant toe dryf. Archie dink hy het ons anker losgemaak omdat dit onder sy boot was en hy was nie lus om uit die baai te vaar dat ons kan uitkom nie. Toe moer hy dit langs die gulet neer dat ons kan uitkom sonder dat hy gepla word. Sugar Baby se kaptein is op sy dinghie om ons landtoue los te maak en toe is hy gereed om vir Maja af te stoot as ons te na aan die gulet kom. Ek trek anker op en ons is veilig. Ons waai vir Sugar Baby se mense. Toe maak die gulet se kaptein die ander tou los dat Sugar Baby kan uitkom.

Alles het goed afgeloop, maar as Archie nie die ankers gaan kyk het nie, kon ons baie skade gekry het.  Ek bedoel aan ons stuurboord kant, is ons naby die rotse en aan ons bakboord kant is Sugar Baby. Aan Maja se agterkant is ook rotse. Ek sê weer, daai kaptein is 'n gemene vark. Archie het ook 'n email vir die charter maatskappy gestuur en gesê hoe gemeen en arrogant die kaptein was en hy moet afgedank word. (Vir wat dit werd is).

Toe vat ons die pad na Söğüt Limanı, 14.9 myl. Ons kry 'n ankerplek en ons ervaar nog 'n salige anker sonder wind. As dit warm is, koel ons in die see af.

Tot siens Sugar Baby

Söğüt Limanı

Söğüt Limanı

'n Charter boot kom gooi te naby ons anker. Dit gaan alles goed totdat die wind draai. Toe kom ons te naby aan hom. (Sy fout. Ons was eerste daar) Hy kan nie nog ankerketting uitlaat nie, want hy is te na aan die rotse. Ons het meer ankerketting uitgelaat as hy, want ons het in dieper water as hy  anker gegooi. Archie ry toe weg van hom. Vir lank gaan dit goed. Maar onthou Gus waai jou maar altyd stadig maar seker wind-af.

Charter boot

In die nag so 3:00 sien ek weer ons is baie naby hom. Ek het op die dek geslaap om wag te hou. Ek maak vir Archie wakker en hy ry weer vorentoe. Ek gaan slaap, want toe is dit Archie se beurt om wag te hou. Ons kan bly wees Gus het baie lig gewaai. As hy sterk gewaai het, sou hulle moes skuif.

Maar Sögüt was 'n mooi en lekker plek om te anker. Ons het dit baie geniet.