25 Julie 2022. Maandag.
Na 'n heerlike nagrus, kies ons weer die hasepad en vandag hoop ons om plek te kry by Catal Bükü. Daar is net plek vir een boot. Jy is gelukkig as jy daar plek kry. Die gulets is ook lief om daar te stop. Ons nader die baai en ons sien die twee hoë maste wat aan 'n gulet behoort. Agge nee! Maar wonder bo wonder is hulle besig om hulle lang landtoue los te maak. Hulle gaan ry! Hoera!
Ons wag dat hulle klaar maak en uitvaar, toe vaar ons in. Ook net betyds, want nog 'n seiljag is besig om nader te vaar.
Ons kry ons plek en ek gooi anker in die sand. Archie maak gereed om die tou land toe te swem. Met sy gewone sierlike boog duik hy in en maak Maja se een kant vas. Toe swem hy met die ander tou land toe en toe is ons vas.
 |
| Landlyn |
Die ander seiljag wag dat ons klaar is, en gooi toe baie versigtig langs ons anker en maak sy jag vas. Maja en haar vriendin, Sugar Baby, staan toe netjies, in harmonie langs mekaar in Catal Bükü. Ons groet mekaar vriendelik. Archie swem en gaan kyk na die ankers. Ons ankers lê so 10m van mekaar af, altwee in die sand.
Nie lank daarna nie, kom 'n klein gulet daar aan en gooi toe vêr voor ons anker en maak aan die land vas. Hulle pla ons nie, want ons weet hulle gaan binnekort weer ry.
Intussen neem die vlieë vir Maja oor. Honderde vlieë vlieg rond, sit rond. Ons slaan dood, jy moet elke vlieg twee keer slaan voor hy dood is. Dan lyk dit of die lewendes die dooies mond-tot-mond-asemhaling gee. Die dooie loop dan weer rond met afvlerk of sleep-agterlyf. Dit het eintlik 'n ouderdomsbeperking nodig om daarna te kyk. Grusaam. Dan slaan jy maar weer. Hulle is op die stoof, sit op die vadoeke, broodplank. Oral. Ek gril.
 |
| Vliegfabriek |
Toe kom daar 'n groot gulet in. 47m lank. Groot. En hy gooi anker en tru tot by ons twee jagte. Ons beduie vir hom hy kan nie so naby ons stop nie, maar hy vee sy gat aan ons af. Inteendeel, kom nog so bietjie nader. Die kaptein van die ander jag, bel die kuswagpolisie en die vrou bel die eienaar van die charter maatskappy. Ons weet sommer almal gaan maar net hul skouers optrek en niks doen nie. Sy toue blokkeer ons totaal. Ons kan nou nêrens heen gaan nie. Ons is vas.
 |
| Groot bure |
Ek en Archie swem land toe. Die baai lyk mooi van bo af, hoewel bietjie oorvol. Toe ons terugkom, is ons een toue baie losser. Ons wonder wat gaan aan. Archie besluit om weer na die ankers te gaan kyk. Ons anker lê seker onder die gulet.
 |
| Helderste water |
 |
| Vol baai |
 |
| Maja en Sugar Baby |
Hy kyk eers na die bure se anker. En wat hy daar sien, skok hom. Daar is 'n tou van die gulet se snoet wat onder sy anker is en weer opgaan na die gulet se snoet. Iemand moes dit opsetlik gedoen het. Hulle kan enige oomblik die anker lostrek.
Archie soek ons anker, maar ons anker is nie meer in die sand nie. Hy kyk met sy snoekelbril op bodem rond en sien toe ons anker lê los op die seegras, omtrent 15m van die plek waar ons anker gebyt het. Net los. Iemand moes ons anker opgelig het en daar gaan smyt het. Hulle het die anker omtrent 15 m sywaarts geskuif. Daar is geen twyfel dat iemand dit opsetlik gedoen het nie nie. 'n Anker kan nie self sywaarts skuif nie.
Archie swem na ons buurboot toe en vertel wat hy gesien het. Die buurboot het 'n ervare Turkse kaptein wat 4 Amerikaanse Turke op privaat charter neem. Archie en die Turke gaan kyk en die Turkse kaptein vra toe vir die kaptein van die gulet wat aangaan. Natuurlik ontken hulle dat hulle met die ankers gepeuter het.
Goed, nou is Maja aan die land vas, die gulet blok ons in en ons het geen anker nie. Krises. Nou sluit Archie Maja se enjin aan, hy swem anker toe en ek moet anker intrek en hoop hy byt weer. As die anker nie byt nie, is ons behoorlik in ons moer.
Ek begin intrek. Die anker trek net seegras saam. Ons weet 'n anker wat vol seegras is, byt nie. Nou skree ek en Archie bevele vir mekaar, want die anker raas. Een van die Amerikaanse gaste op die gulet vra vir Archie wat aangaan en hy sê toe hy kan vryduik (9m) en anker skoonmaak. Hy doen dit toe en ek trek weer in. Ons het gelukkig aanvanklik 45m ketting uitgegooi.
Ek trek anker in, Archie kyk op die bodem wat die anker doen en op 30m byt die anker wonderbaarlik. Ons is weer vas.
Die buurboot bel weer en die kaptein van die gulet kom skree op die Turke. Hy skel ons nou behoorlik. 'n Ruk later kom die kuswagpolisie daar aan en gaan saam met die kaptein na die gulet se kaptein. Ons kry toe so lekker dat die kaptein se naam gat gemaak word voor sy Amerikaanse gaste. Die polisie kom neem verklarings af by Sugar Baby se mense. Wel, al wat ek kan sê, is drie hoera's vir die polisie. Die kaptein van gulet het 'n waarskuwing of boete gekry omdat hy met ons ankers gepeuter het. Hy is 'n opperse vark.
 |
| Vermy hierdie maatskappy ... |
 |
| ... en hierdie kaptein |
Ons het nog nooit so iets in Turkye beleef dat iemand ons opsetlik leed wou aandoen nie. Wat jou anker losmaak en op seegras gooi en nie omgee dat Maja op die rotse kan loop nie. Ons vermoed hulle wou Sugar Baby se anker ook losgemaak het, maar gelukkig het Archie weer na die ankers gaan kyk. As hy dit nie gedoen het nie, ys ek as ek dink wat kon gebeur het.
Ek plaas die kaptein van die gulet in dieselfde katagorie as Sue. En laer as dit, kan mens nie daal nie.
