5 September 2017. Dinsdag.
 |
| Koukounitsa tot Preveza |
Ons seiljaar kom nou vinnig tot ’n einde. Vandag gaanons
Preveza toe, 8.4 myl. Archie moet na die hawe polisie gaan om die seil dinge af
te sluit, ons moet Maja vol diesel gooi en vir oulaas ’n vis koop. Dan gaan ons
sommer langs die kaai vir oornag, voordat Maja môre by Aktio Marina uit
die water gehaal word en dan is dit die groot voorbereiding vir haar
winterslaap.
Die seisoen word dan afgesluit met ’n toer op droë
grond deur Macedonië en miskien ook Bulgarye. Ons Schengen tyd is verstreke en
ons vlieg eers 1 Oktober vanaf Athene na Suid-Afrika.
Ek sien 'n catamaran met 'n klein Suid-Afrikaanse vlaggie langs die kaai. Ek stap nader en roep die man. Hulle is toe inderdaad van Suid-Afrika, Charl en Mary du Plessis. Ons maak 'n afspraak om laatmiddag iets te gaan drink en mezes te eet. Om 18:00 stap ons na hulle jag en hulle nooi ons vir drankies. Ons kuier heerlik aan boord op Ciccio. Ons hou dadelik van hulle en gesels heerlik.
 |
| Archie |
 |
| Charl en Mary |
Ons stap saam na 'n wynkroeg, maar die plek is te spoggerig om huiswyn te bedien en hulle sê ons moet die taverna langsaan probeer. Ons jou waarlik! Hulle het heerlike huiswyn wat jy by die kilo koop. Ja, hier in Griekeland koop jy nie 'n liter huiswyn in 'n kraffie nie, jy koop 'n kilo.
Ons bestel saganaki, tjips en nog iets met 'n snaakse naam wat ek glad nie kan onthou nie. Ons eet heerlik en drink yskoue wyn met baie ys. Staaltjies en stories word uitgeruil en dit word 'n heerlike aand om te onthou. Ons sal maar môre-aand die Levraki vis bak wat ons vandag gekoop het.
 |
| In die taverna |
 |
| Mary, ek en Charl |
