31 Mei 2015, Sondag.
 |
| Söğüt tot Serçe |
Die boek sê dat as die Meltemi (die heersende noord-westewind) sterk in die seestraat tussen Turkye en Simi waai, kan dit windvlae vanaf die land se kant veroorsaak. Hierdie vlae werk teen die seestroom en veroorsaak ’n verwarde see. Dis nou ’n see waar die deinings nie weet watter kant toe om te rol nie. Dan moet jy versigtig wees as jy om Karaburun, die punt tussen die Yesilova- en Marmaris Körfezi vaar. Gelukkig waai die Meltemi nie vandag nie, so die gevaarlike stuk see is hondmak.
Ons gaan vandag om
die punt vaar na Serçe, 36°34.605 N, 28°02.688 O, 15.7 myl. Dis ’n baai wat
amper heeltemal deur land omring is. Ons gooi anker in die helder turkoois
water en kyk na die mooi omgewing.
 |
| Karaburun (Kara Punt) met Simi Eiland in die agtergrond |
Ons gaan stap en Archie klim die
klipkoppie uit om ’n beter uitsig te kry. ’n Baai lyk altyd mooier van bo af.
Ek sit onder op ’n muur en tuur na die see.
 |
| Serçe - Suidelike baai |
 |
| Serçe Baai |
 |
| Sit en tuur |
Die gestap maak mens warm en ons
koel af in die helder skoon verfrissende water. Archie snorkel en gaan kyk of die anker goed gebyt
het. Al is die water 9 m diep, kan ons tot op die bodem sien. Hy kom terug met
die nuus dat die anker goed gebyt het, maar omtrent vyf tot tien meter van ons
anker is ’n konkreet blok. As Maja rondswaai, kan die ankerketting om die blok
draai.
Ons hoop nou maar vir die beste
...
