08
Julie 2016. Vrydag.
 |
| Kuşadası tot Pithagorion |
Ek verjaar vandag.
Ons neem afskeid van Deon en Ryna. Hulle sit vandag hul reis in Turkye voort. Ons gaan hulle regtig baie mis.
7:30
stap ons na die hawemeester en immigrasie om uit Turkye te klok. Papierwerk
word afgehandel en die polisie wil die boot sien. Ons kry ’n taxi, want hy wil
nie loop nie. By Maja gekom, gee hy haar net een kyk en hy is tevrede. Deon en
Ryna is toe net op pad om op te saal en bushalte toe te loop.
Ons
het R150.00 vir die taxi betaal om die doeane man heen en weer te karwei en Deon en
Ryna kry toe ’n taxirit. Dis mos klaar betaal en hulle hoef nie so vêr te loop
met die swaar rugsakke nie. Ons groet weer en daar trek hulle.
Ons
kry vir Maja gereed en vertrek uit Kuşadası op pad na die volgende hoofstuk.
Weer na Griekeland en wel na Pithagorion, 37°41.375
N, 26°56.787 O, 22 myl. Dis op die eiland van Samos.
Gus waai en ons seil vir 3h15min.
Die blerrie Gus wil nie ophou waai nie. Die dorp lê voor ons en ons gaan na die
dorpskaai. Dis vol, maar ’n jag is besig om reg te maak om te vertrek. Wat ’n geluk.
Hulle sê hulle sal oor 10 minute vertrek. Ons wag.
 |
| Pithagorion, geboorteplek van die wiskundige Pythorgoras |
Hulle trek anker op, maar o wee. Hulle anker sukkel en hulle trek iemand anders se anker totaal uit die water. En ons wag. Hulle sukkel en al die jagters staan op die snoete van hul bote en kyk. Seilers kyk mos altyd skaamteloos as iets verkeerd loop. Hulle sukkel met die anker en almal skree raad. En ons wag.
 |
| Sukkel met anker |
Hulle sukkel. Eindelik toe die anker los is, gooi hulle dit terug in die water, by die plek waar ons wou ankergooi en terug tru. Toe wil ek nie daar gooi nie. Die jag se anker is nou los op die bodem van die see en hy is los. Nee wat, dit klink te onveilig vir my en ons gaan gooi toe anker in die baai.
 |
| Vol ankerplek |
’n Eienaardige wolk kom oor die heuwel uitgerol. So bruinerig. Ek dog eers dis ’n stofstorm. Ons klim in Dinkie en vaar land toe. Ons moet nou weer in Griekeland inklok. Die hawepolisie se kantoor is toe. En ons wag.
 |
| Wolk agter die heuwel |
Toe hy te voorskyn kom, doen hy sy deel en stuur ons na die immigrasie toe. Ons loop die honderd myl tot waar hy beduie, maar ons sien niks. Stap terug en vra ’n taverna eienaar. Hy beduie bult-op. Ons stap. Maar niks. Vra weer. Sy beduie bult-opper. Kom daar maar die polisieman sê dis die verkeerde plek. Beduie weer en ons loop weer die honderd myl terug. Dis toe ’n klein geboutjie aan die eindpunt van die veerboothawe. Hy klok ons in. Terug na die hawepolisie en die doeane en alles is afgehandel. Ons is wettige immigrante.
Die bruin wolk is nou vreeslik
groot. Hulle sê dit is ’n dorpie anderkant die bult wat brand.
Ons gaan kyk na Samos se geskiedkundige geboue, ou kerke en kastele.
 |
| Samos brand af |
Ons gaan kyk na Samos se geskiedkundige geboue, ou kerke en kastele.
 |
| Vroeë Christelike basilika |
 |
| Kasteel van Lycourdos Logothetes |
 |
| Kasteel van Lycourdos Logothetes |
 |
| Kerkdeur |
Terug by Maja hou ons die aktiwiteite dop. Helikopters met waterbomme vlieg heen en weer. So oranje helikopter met ’n slurp suig water uit die see op en vlieg dan in die wolk se rigting. Ander vliegtuie vlieg almal in die rigting van die vuur.
 |
| Laai water op terwyl dit vlieg |
 |
| Gaan vuur blus |
 |
| Helikopter met slurp |
 |
| Bruin rookwolk lug |
En al wat Gus doen, is waai. Hy waai daai vuur so flink aan dat g’n mens dit kan stop nie.
Intussen, by die veerbootkaai, is
luide stemme. Dis vlugtelinge wat wag om op die veerboete te klim wat argumenteer.
Hulle staan lank in rye voordat hulle gelaai word en die twee bote uiteindelik
vertek in Kusadasi se rigting. En Gus waai.
Die hele aand is die vliegtuie besig
om die vuur te blus. En my vriende en familie sê hulle hoop ek het lekker
verjaar …
Toe ons die volgende oggend
opstaan, is Maja toe onder die roet wat gedurende die nag afgedaal het na
benede. Sy ruik na veldbrand.
