Çiftlik.

22 Augustus 2016. Maandag.

Serçe tot Çiftlik

 
Die oggend draai Gus weer en waai vanuit die noorde. Ons kom baie naby aan die gullet en Archie trek 20 m ankerketting in. Nou is ons net met 20 m in 10 m diep water geanker. Dis darem dag en Gus waai baie lig. Archie hou die sake dop. Ons maak klaar en vertrek na Çiftlik, 36°42.909 N, 28°14.275 O, 13.6 myl.

Op pad

Gus waai liggies en ons span nie seile nie. Ons vaar net vorentoe, altyd vorentoe. Daar is ’n paar groot ruwe rotse langs die pad. Om die draai en daar is Çiftlik. Ons het water nodig, so ons gaan na die restaurant kaai toe. Jy kry water en elektrisiteit gratis, want jy eet by die restaurant. Daar is selfs ’n stort. In plaas daarvan dat ons ten duurste vir ’n marina betaal, meer ons vas by ’n restaurant kaai en jy gaan eet die aand daar. So kry jy darem waarde vir jou geld.

Ons vaar in en Mehmet waai met die rooi vlag. Hy help ons om vas te maak en hier is ons, in Çiftlik. Ons gaan stap en die droë grond onder my voete is heerlik. Dis nog baie warm hier en na die stap swem ons. Die lou water koel jou nie af nie.

Çiftlik

Archie en die vullis

 
Çiftlik is ’n gelukkige plek. Hier swem en dryf almal lui-lui in die see rond. Of hulle sit op die strandstoele. Twee klein Turkse seuntjies met vlerkies aan die armpies stap op die pier en spring dan keer op keer in die water. Sonder moeg word. Weer en weer. Hulle druk ewe meisieagtig hulle neuse toe.

Boeties stap …

… boeties spring

 
Na ’n lekker stort trek ons aan en stap na Mehmet Place. Die eetplek is onder die bome en die hele familie werk saam. Mehmet is bietjie skeel en ek weet nie wanneer hy vir my kyk nie. Of kyk hy dalk vir Archie. Ek eet garnale en Archie eet ’n seekat bredie. Die kos was uit die boonste rakke.

Mehmet Place

Uiteet

Mehmet en sy dogter, Archie en sy seekatbredie

Garnale

Versadig en tevrede stap ons terug na Maja. Archie sê: ”Money well spend.”

Serçe Limanı.

21 Augustus 2016. Sondag.

Bozburun tot Serçe Limanı

Vandag is dit weer om die punt, Ala Burun. Hierdie punte kan moeilik en deurmekaar wees as Gus waai. Gelukkig gedra Gus hom deesdae al te ordentlik en ons vaar om die baai sonder enige probleme.

Ons gaan vandag na Serce Limanı, 36°34.617 N, 28°02.690 O, 15.8 myl. Die ander boek het baie te sê oor die baai. Charter bote mag nie die baai gebruik nie, want die houkrag is sleg. Gus kan hier met vlae en draaie inwaai. Ons was al twee keer vantevore hier en het nog glad nie probleme gehad nie. 

Serçe Baai

Mooi baai

Ons gooi anker in die baai en ons is bietjie te naby ’n gullet dat daar aan die land vasgemaak is. Solank die wind reg waai, sal daar nie probleme wees nie. As die wind van die noorde kom, sal ons in sy rigting waai en te naby kom. 

Ons voorrade raak min. Gulukkig het ons 'n blikkie tuna, een groot tamatie en n paar uie. Ek maak "Tuna a la Ansu". Sy het dit vit ons twee jaar gelede op Maja gemaak en dit was heerlik. Ek garneer dit met gekookte eier en 'n paar roketblare.

Tuna a la Ansu

Archie stel twee anker alarms. Mens weet nooit wat gebeur in die nag as mens slaap nie. Ek gaan slaap in elk geval op die dek om sake dop te hou. 03:00  draai die wind na noord ons ons kom nader aan die boot. Gelukkig draai Gus in sy spore om en waai weer suid-wes en ons dryf weer vêrder weg.

Ek slaap die hele nag met een oog oop.

Sonsopkoms

Bozburun.

20 Augustus 2016. Saterdag. 

Keçi Bükü tot Bozburun

Rimpelloos het ons gaan slaap en rimpelloos staan ons op. Vandag is dit Bozburun se omgewing. Daar is ’n klomp ankerplekke en ons sal maar besluit waar om te anker as ons daar kom.

Die omgewing is besaai met hoë berge wat minder en meer mistig in die vêrte pryk. Bote kom en gaan. Dis gewilde seil gebied hierdie. Gus waai net liggies en die son skyn helder. ’n Paar wolke hang in die lug, wat later soos mis voor die son verdwyn.

Oggendskoot - Vêrte

Ons kom by die vlak deel tussen die eilande waar ons wil anker. Dis oorvol en geen plek vir ons nie. Ons vaar om die hoek en die baai is te diep. Ons vaar stry-stry verder en na ’n erge stry gooi ons anker in Bozburun, 36°41.247 N, 28°02.136 O, 19.4 myl.

Dis ’n mooi baai met die dorp wat daar anderkant met ’n maswoud vir ons glimlag. Ons is te vêr van die dorp af, so ons gaan stap maar op die droë land. Dis altyd vir ons vreeslik mooi om af te kyk en te sien hoe vreedsaam die bote in die baai lê, sierlik en trots, sonder ’n kwelling.

Maswoud

Bosburun baai

Binneland

Borrel van windlose geluk

Kaptein

Geroeste skeepslee

Laatmiddag berge

Archie swem amper saam met ’n skilpad. Hy probeer hom inswem, maar ek dink skilpaaie kan vinniger swem as wat hulle kan loop. Hy verdwyn onder die water (ek bedoel nou die skilpad) en weg is hy.

Dis nog ’n stil rimpellose nag, in my borrel van windlose geluk.

Keçi Büyü

19 Augustus 2016. Vrydag. 

Kuyulu Bükü tot Keçi Bükü

 
Ons is soos vlinders. Ons dartel van die een bükü na die ander. Die een so mooi soos die ander. En vandag is dit Keci Bükü, 36°45.532 N, 28°07.560 O, 4 myl, net aan die oorkant van die baai.

Ons gaan eers na Marti Marina om diesel in te gooi en ons swart water te laat uitpomp. Toe gaan ons na die baai waar ons wil anker. Dis hier waar ek verlede jaar die sirenes gehoor het. Ons kry ’n geskikte plek en gooi sonder sukkel of stry. Dit byt pragtig en ons is tuis. 

Keçi Baai met sy beroemde sandbank

 
Die pragtige baai is bekend vir die sandbank wat die baai in twee deel. Toeriste van heinde en verre kom om op die sandbank te loop. Dan loop jy tot vêr in die baai in enkeldiepte water. Heeldag loop die toeriste heen en weer.

Sandbank lopers

"Star Walk"

 
Wel, as dit is wat mens hier moet doen, wie is ons om te stry! So, ons saal vir Dinkie op met haar motor en daar trek ons. Ons loop saam met die res op die sandbank, soos ware toeriste.

Archie

Ekke

 
Die aand is die baai soos ’n bad water. Daar is nie ’n windrimpel nie. Die aand glim in die glans van die maan. Die ligte weerkaats in die water.

Weerkaatsing

 
Ek leef in ’n borrel van windlose geluk.