Saturday, September 17, 2016

Kemer.



14 September 2016. Woensdag.

2016 roete
Phaselis tot Kemer
 
Die kaptein verras my met pannekoek vir die laaste seil oggend. Dit smaak vorentoe.

Kaptein Pannekoek
 
Vandag is ons laaste dag op see. Ons is op pad na Kemer, 8.2 myl. Ons verlaat die rustigheid van die baai. Die antieke stad sluimer tussen die bome, die gulets is nog lank nie in sig nie.

Dis nou net vir laaste anker van die seisoen optrek en weg is ons. Die wolke hang swaar oor die berg en doer vêr in die oop see lyk dit of ’n lekker reënbui daar uitsak. 

Eerste reënstorm
 
Die kaptein is baie hartseer, want dis sy laaste dag op see en hy kan nie eers seil nie. Gus waai liggies van voor en Maja se enjin prrr geduldig na ons laaste bestemming. 

Seerowerskip en wit kranse
 
Sommer gou lê die marina voor ons en ons roep oor kanaal 73. Ons moet eers die swartwater uitpomp. Ons meer langs die dieselkaai vas en ’n marina skare van vier heet ons welkom. Name word uitgeruil en blad word geskut. Ons voel toe sommer baie welkom.

Daar's die marina
 
Een van die manne kom sommer aan boord om met die vasmeer te help. Ek is totaal oorbodig, want die man doen alles. Sowat van goeie diens! Die beste wat ons nog gehad het.

Toe is alles klaar. Ons is by Maja se oorwinter huis. Dit voel snaaks. So asof nog iets moet gebeur, of nog ’n baai besoek moes word, nog ’n anker, nog ’n kaai. Maar hier is ons in Kemer, tussen die majestueuse berge. 

Kemer Marina
Marina
 
Hier gaan ons vir ’n week bly om alles reg te kry vir Maja se winterslaap.

Friday, September 16, 2016

Phaselis. Antieke stad.



13 September 2016. Dinsdag.

Vandag besoek ons die antieke stad van Phaselis. Die koloniste van Rhodes het dit vroeg in 7de eeu v.C. tot stand gebring. Die gebied se rykdom het gekom van die verskeping van hout, roosolie en parfuum. Die stad is in 333 v.C. deur Alexander die Grote oorgeneem, maar daarna was dit semi-onafhanklik onder Roomse jurisdiksie.

Die stad lê in die skadu’s van dennebome en is omring deur drie klein perfekte baaie. Die fondasies van die gesonke hawe is nog duidelik te sien.

Gesonke hawe
 
Ons stap in deur Hadrian’s Gate. Die agora is geleë naby die suidelike hawe en die straat wat van die noordelike hawe kom, is pragtig. Daar is ook uitgebreide baddens en die oorblyfsels van die stad se akwaduk.

Hadrian's Gate
Ou ingang
Die pad na die hawe
 
Die teater, wat hoog teen die kant van ’n koppie lê, is nog in ’n goeie toestand. Daarvandaan kan jy op die pragtige hoë berge wat trots in die vêrte staan, uitkyk.

Teater met die Tahtalı berg in die agtergrond
 
Ons sien die gesonke breekwater baie duidelik en is vreeslik bly ons het nie daaroor gevaar nie. Maja lê vreedsaam in die baai vir ons en wag.

Marieks by die gesonke breekwater
Suiderlike hawe

Phaselis.



12 September 2016. Maandag.

Cineviz tot Phaselis

Na ’n heerlike nagrus trek ons anker op. Soos gewoonlik het hy goed gebyt. Vandag gaan ons na Phaselis, 9.9 myl.

Weereens kyk en waardeer ek en Archie die pragtige kuslyn. Ek sit agter die helm en voel ’n effense ruk aan die stuurwiel. Die spoed verminder en ek sê vir Archie iets is fout met die enjin. Ons word al twee koud en ek sê vir Archie miskien is dit iets in die propeller.

Dit beteken ’n vroeë swem vir die kaptein en jouwaarlik! ’n Uisak is rondom die propeller gedraai. Ons albei slaak ’n sug van verligting. 

Archie en die sondebok

Ons kom by Phaselis en kyk uit waar is die gesonke breekwater en die ander onderwater rotse. Ons wil nie hê onse Maja moet op die rotse loop nie! Archie omseil dit alles en ons soek ankerplek en gooi.

Phaselis Baai met gesonke breekwater
Maja op anker


Hier is ’n antieke stad en al wat ’n gulet stop hier. Hulle kom ingevaar met luide musiek en vrolike gesigte wat reg staan om in die water te spring. Snaaks, bitter min mense gaan kyk na die antieke stad. Hulle swem net. Dan eet hulle middagete en weg is hulle na die volgende strand. 

'n Gulet is n tradisionele Turkse hout seilboot. Deesdae seil hulle nie eintlik nie. Jy kry hulle in verskillende groottes. Die gulets wat hierheen kom, is besonder groot en oordadig versier.  

Phaselis Baai met gulet
Flambojante gulets

Ek en Archie sit langbeen op die dek en kyk na die fliek wat voor ons afspeel. Later vaar hulle een vir een weg en dan is ons weer amper alleen in die baai. Dis net ons, die maan en die dowwe reuse wat oor ons waghou.

Wednesday, September 14, 2016

Çineviz.



11 September. Sondag.

Finike tot Çineviz

Vandag is dit ’n lang pad na Çineviz, 27.1 myl. Ons vertrek vroeg, 06h30 uit Finike en die eerste deel is net die lang kruising van 12 myl oor die groot baai. Dan is dit om die punt en dan noord-oos. Gus gedra hom baie goed en ons seil vir ’n baie kort ent. Toe is dit weer seile af en ons prrr verder. Hierdie winde is verseker nie die erge winde wat ons die jaar in Griekeland gehad het nie

Die kuslyn in die deel van die wêreld in ongewoon mooi. Mooi berge en kranse wat tot in die see strek. Archie sien weer vir Skillie en hy is baie groot en die mooiste helder kleure. Toe ek hom op film wil verewig, duik hy die dieptes in. 

Pragtige kuslyn

Ons vaar verby ’n deel waar daar ’n klomp grotte is en vir ’n bonus sien ons ’n paar dolfyne. Hierdie is kykgenot en sienplesier. 

Grotte
Naby Çineviz

Ons kom by ons baai. Dit is die noordelike baai, want dit is meer beskut as die baie mooi suidelike baai. Ons kry ankerplek en gooi daai anker dat hy goed byt. Hierdie deel van Turkye het bedags ’n suidewind en saans ’n noordewind. Die Meltemi waai nie hier nie. Ons baai het sterk rukwinde in die vroegaand as gevolg die hoë berge. 

Ingang tot die baai

Ons gaan stap op die land en sien van bo af hoe mooi is die suidelike baai. Die berge is te steil en ons kan nie ’n hoë uitsig van ons baai kry nie. Die berge in die vêrte het ’n donsige wit wolkkombers wat saggies op sy pieke rus.

Suiderlike baai
Çineviz Baai
Çineviz ankerplek

Hier is sulke wonings wat soos plakkershuise lyk. Mense bly hier en hulle ontsier die baai met hulle rommel. Ekskursie bote kom en gaan met plesiersoekers wat in die een baai na die ander swem. 

Plakkers
Sitkamer

Die rukwinde kom en pluk aan ons, maar dit hou gelukkig nie lank aan nie. Hier slaap vanaand nege ander bote saam met ons in die pragtige baai.