Gökkaya

3 September 2018. Maandag.

Karaloz tot Gökkaya

 

Nadat Archie vir die kaptein van die gulet hard en duidelik gesê het dat ons wil vertrek, maak hulle aanstaltes om te vertrek en ons kan ook gereed maak om die pad te vat na Gokkaya, net 3.8 myl.

Yvon swem land toe en maak die toue los en toe trek ek die anker op en daar trek ons. Archie is agter die helm en ons vaar na die pragtige baai.

Hier is ook 'n grot en Yvon en Louise roei in Dinkie soontoe om dit te gaan verken. Ek en Archie wag vir hulle op Maja en kort voor lank is hulle terug en weer aan boord. Toe vaar ons verder.

Grot toe

Maja

Maja vanuit die grot

 

Daar is reeds 'n paar bote in die baai, maar plek is daar genoeg en ons gooi in lekker vlak water anker, soms is dit net 1 meter onder die kiel.

Yvon en Louise gaan stap 'n deel van die Lycian Way staproete en neem 'n foto van die baai waar Maja en haar vriendinne rustig op anker lê. Hulle kom warm en natgesweet terug. Natuurlik is in die see spring die aangewese ding om te doen en hulle koel af.

 

Gökkaya Baai

 

Hierdie baai se water is dik. En die boonste deel van die water is yskoud en minder sout. Hier moet êrens koue vars water van êrens onder die grond kom. Ons koel behoorlik af as jy inklim. As jy dan net in die water hang, is dit net jou nek en skouerknoppe wat koud kry. Die res van jou lyf kry heerlik warm.

Later gaan stap ek en Archie die Lycian Way in die ander rigting (suid-oos) en sien die baai vir die eerste keer uit 'n ander, baie mooi, hoek.

 

Gökkaya

Gökkaya

Ons eet die aand cous-cous slaai en 'n lensieslaai wat Yvon en Louise voorberei. Heerlik!

Karaloz.

2 September 2018. Sondag.

Finike tot Karaloz

Ons laat vir Finike agter in sonnige oggendstond. Ons nuwe bestemming is Karaloz, 16.3 myl. Dis 'n ankerplek by Kekova Adası. 'n Vreedsame, rustige plek wat Till verlede jaar terdeë geniet het.

Tot siens Finike

Dis maar weer 'n ou vervelige pad. Louise is agter die helm en bestuur vir 'n baie lang tyd. Archie vat naby die bestemming oor. Kenmerkend van Karaloz se ankerplek, is die grot by die ingang van die baai. Die rotse by die grot het so 'n sponsagtige tekstuur. Baie interessant.

Ons vaar die baai binne en die kaptein soek ankerplek. 'n Gawe Turk wat reeds "line ashore" in die baai is, gee vir ons goeie raad oor waar ons kan anker. Archie volg sy raad en alles is reg vir aksie. Ek gooi anker,  Archie tru en duik later met sy sierlike boog om die toue land toe te swem en die Kanadese help met die trek van die agtertoue. Toe is ons baie knus vas in die baai. Te heerlik.

"Line ashore"

Dis nou totdat die blêrrie gulet op ons voorstoep kom intrek. Sy boot is op ons anker, so ons kan nêrens heen gaan nie. Gelukkig swem die mense net gewoonlik  en dan vertrek hulle. Daar is  'n klomp Duitsers aan boord. Ek voer maar klein vissies met brood wat ek moet verkrummel tot amper meel. Hulle hou aan en aan eet asof daar geen môre is nie.

Honger vissies

Archie-hulle gaan klim die koppie vir foto's, maar die ou gulet bederf die hele atmosfeer van die baai. In plaas daarvan dat Maja romanties in die baai lê, sien jy net die gulet. Dit word al hoe later, maar vertrek is min. Die klomp gaan vanaand hier oornag, op ons voorstoep.

Stappers

Karaloz

Blêrrie gulet

Yvon en Louise maak vir ons ratatouille en hoender en ons eet heerlik. Hulle is behoorlik natgesweet agter daai kospotte.

Kookspan

Die gulet se mense het gelukkig nie baie geraas nie en ons kon heerlik slaap. Dis net die hitte wat pla.

Finike Marina.

1 September 2018. Saterdag.

Çineviz tot Finike

Ons verlaat die pragtige Çineviz en vaar na Finike, 27.2 myl. Die berge is oop en vriendelik, skuil nie vandag skaam agter die deinserige donskombers nie. Die omgewing is waarlik pragtig. Die vissermanne gebruik die heerlike weer om 'n groot vangs te vang. Hulle glim in die oggendlig.

Pragtige kuslyn

Vissermanne

 

"Aanstap Maja, die pad is lank en swaar..." Dis 'n lang, amper vervelige pad en ons vaar vorentoe, altyd vorentoe. Yvon kry 'n beurt agter die helm en toe bestuur Louise die res van die pad. Archie maak haar touwys en sy leer vinnig. Sy geniet dit baie om agter die stuur van sake te staan.

 

Agter die stuur

Louise en Yvon

Yvon

Louise word touwys gemaak

 

Ons word beloon net 'n klonp dolfyne wat met ontbyt besig is. Hulle vervies hulle as ons nader kom en wei dan in 'n ander rigting. Die twee besoekers is in hulle skik om dolfyne te sien.

 

Skaam dolfyne

 

Later sien ons baie vliegvisse. Die visse kan darem baie vinnig oor die water vlieg en duik dan met 'n plons in die water in. Hulle is amper dieselfde kleur as die water. Dis nogal moeilik vir die gaste om hulle vir die eerte raak te sien.

Na 'n laaste vervelige stuk oor 'n groot baai, lê die marina voor ons en ek roep hulle op kanaal 73. Die swartwater word uitgepomp en toe word ons na rusplek vir die nag begelei. Die marina manne is baie bekwaam en ons is sommer gou-gou vas.

 

Finike Marina

 

Archie, Yvon en Louise stap in die hitte van die dag Migros toe vir voorrade en ek gaan was wasgoed. Mensig, maar dis warm hier in die wêreld. Ons sit blinkgesig op die boot. Dit koel verdomp nie af nie.

Ons eet heerlike koue salm met slaai. Net die regte kos vir so 'n warm aand.

Çineviz.

31 Augustus 2018. Vrydag.

Phaselis tot Çineviz

Na ons kapteinskoffie, vertrek ons na Çineviz, 9.9 myl. Sien, ons vaar in ons spore terug, net soos ons omtrent 'n week vantevore gekom het. Vandag is dit glad nie so mistig en bewolk nie. Die dag het niks om weg te steek nie en die hoë berge en dale pronk pragtig.

Dis nog steeds midsomers-warm. Van afkoel is daar nie sprake nie. Sweet is ons voorland.

Çineviz is nog net so pragtig soos altyd. Die kaptein soek na 'n geskikte plek on ons gooi foutloos anker en soos gewoonlik is hier baie toerbote met sonsoekers wat hier baai. So ons baai maar saam.

Çineviz

Toe dit effens afkoel, roei ons al vier saam in Dinkie land toe. En die uitsig oor die suidbaai stel nie teleur nie. Dis baie mooi. Ons bekyk wat te bekyk is en stap terug na Dinkie. Archie en Louise swem terug en ek en Yvon roei.

Gaan land toe

Çineviz Baai

Sazak Limanı (Suidbaai)

Sazak Limanı (Suidbaai)

Na so 'n warm stap, is baldadige baljaar in die water die aangewese ding om te doen. Louise swem soos 'n vis in die water en ons baljaar soos kinders.

Yvon

Archie en Yvon

Louise

Archie swem later na Skillie toe en sien 'n vis wat onder aan Skillie vassuig. Hy lees op daaroor en dit is 'n remora.

Die son sak vroeg agter die berg en ons eet heerlike lam met groete-noedelrys. Smaaklik. Die nag is dit baie warm.

Phaselis.

30 Augustus 2018. Donderdag.

Kemer tot Phaselis

Toe is dit amper tyd. Tyd om die Franse Kanadese, Yvon en Louise, welkom te heet. Maja is slaggereed vir hulle koms en ons ook. Ons stap na die veerbootkaai.

Dis tyd vir die gaste om van Antalya te kom, maar dis ook tyd vir al die gulets in die marina om met al hul plesier- en sonsoekers om te vertrek. Ons kyk na die bedrywigheid op die kaai. Die reuse gulets lyk soos seerowerskepe en hulle verlaat een vir een. Die marina man in sy dinghie, help stoot hul in die regte rigting. Harde Russiese musiek word oral op die gulets gespeel. Daar is mos hoeka baie Russiese toeriste aan boord.

Gereed vir die besoekers

Gulet vloot

Viking

Gulet vertrek

Toe kom die veerboot en daar is Yvon en Louise. Lekker om hulle weer te sien. Die arme goed kry so warm. Hulle kon mos van Quebec se wêreld en dis mos nie so warm daar nie.

Ons stap na Maja en hulle loop die plank."Welkom aan boord, julle!" Hulle gaan verken gou die plek, ons eet iets en toe is dit tyd om Kemer Marina te verlaat.

Hulle is hier

Archie, Yvon en Louise

Yvon loop die plank

Louise volg

Ons gaan vandag na Phaselis, 7.4 myl. Dit is mos 'n antieke stad. Oral in die baai is oranje boeie. Grotes. Ek skuif agter die helm in, en Archie en Yvon staan gereed om die boei te gryp. Maar hy is swaar. Dit ruk amper die boothaak uit sy hand uit.

Archie besluit om die boei aan die agterkant van die boot te gryp. Hy stuur Maja sekuur op die boei af. Yvon staan gereed met die tou. Toe Archie by die boei is, sit Yvon vinnig die tou deur die ring. Toe trek hulle die boei na Maja se snoet en maak haar vas. Wat 'n geluk! Ek hoef nie eers anker te gooi nie! Toe verdien ons daai koue drankies!

Naby Phaselis

Nooiensvaart

"Cold beverages"

Toe gaan besoek ons die antieke stad, Phaselis. Dis nogal 'n ding om droogsboud in Dinkie in die golwe by die land te kom. Archie vat eers vir Yvon en Louise en kom haal daarna vir my.

Boud natmaak

Die stad het in 690 v.C. ontstaan deur koloniste van Rhodes. Dit het gegroei tot 'n vooruitstrewende handelstad, met drie hawens, waarvan die oorblyfsels vandag nog te sien is.

Die plek was bekend vir sy ligte, vinnige seilbote, die phaseli. Ongelukkig is daar nie voorbeelde of illustrasies van die vaartuie nie.

Ons stap deur die ouwêreldse stad en sien baie hedendaagse bruidspare. Skitterwit tussen die klippe. Ons kyk na die badhuise, ou geboue en die teater. Die denkers dink ook nie nou se dae so diep( soos verlede jaar) in die antieke teater nie.

Klein badhuis

Aquaduct

Aquaduct

Piekniek tussen die ruïnes

Gifappeltjie

Hoofstraat

Teater

Ligsinnige denkers dink nie

Bruidspaar

Terug om Maja was daar 'n effense stort insident wat Yvon insluit, en Archie moet die probleem eers weer "fix", maar gelukkig kén die kaptein mos van goeters fix. En reg is die buitestort weer.

Yvon

Ons eet heerlike groenboontjiebredie. Die Kanadese is moeg en ons gaan kruip in. Wat 'n heerlike dag!