Şehir Adalari

13 Mei 2015

Van Çokertme tot Şehir Adalari

 

Vandag was deur en deur ’n vısuele dag. ’n Dag van siengenot, van oogplesier.

’n Nuwe dag begin en ons is op en wakker om te vertrek. Ons is voor die son op, toue word losgemaak, anker opgetrek en weg is ons na Şehir Adalari, 36°59.647 N, 28°12.460 O, 24 myl. Die son kom oranje-warm oor die berg op en werp sy skel strale op die see, wat dit versag tot roosgoud rimpels wat rol.

Oranje-warm ...

... met roosgoud rimpels

Die berge staan met hulle voete in die see terwyl hulle hoog oor die see uitkyk na daar ver. Maja prrr lustig en vrolik voort. 

Voete in die see

Na 20 myl kom ons by Akbük Limani. Ons wil die plek net van nader bekyk. Die Aegan Clipper staan in die baai op anker. Ons maak 'n draai in die baai en vat die pad verder na Sehir Adalari.

Akbük Limani

Ons vaar die baai in en die toerbote staan die kaai vol. Ons anker toe maar ’n redelike ent van hulle af, want on weet nie waar hulle ankers is nie. Voor die reën wat hulle voorspel het, sit Archie Dinkie se motor versigtig op (hy is bang hy laat dit in die see val) en ons gaan land toe.

Ons besoek die baie geskiedkundige eiland met vollop ruïnes van die antieke tyd. Ons loop die pad na die verlede en sien die kerk van ouds, die basilica, die agora. Die mooiste vir ons is die teater. Dit kon 2 500 toeskouers huisves. Ek neem my sitplek in en wag vir die skouspel om te begin. Maar al wat ek sien, is ou Archie. Oral staan ou-ou olyfbome. Maggies, maar dis mooi!

Kerk

Teater

"Let the show begin"

Marieks op die muur

Die groot trekpleister is Cleopatra se strand. Daar word oorvertel dat Cleopatra en haar Antony baie tyd hier op die strand deurgebring het. So groot was haar liefde vir hom, dat sy ’n skeepsvrag vol sand van die Sahara woestyn laat kom het om op die strand te gooi. Deskundiges het die sand blykbaar ontleed en bevind dat dit inderdaad sand van die Sahara is en dat die tipe sand nie in die omgewing voorkom nie.
 

Cleopatra se strand

Daar word baie gedoen om die strand te bewaar. Daar is ’n bewaarder wat die sand bewaar. Hy kyk dat besoekers nie sand steel nie, wat in die verlede dikwels gebeur het. Jy mag glad nie op die sand loop nie, dis is toegespan. Hulle het trappe gemaak waarop jy loop as jy wil gaan swem. Baie voornemende Cleopatras swem hier en word dan uit allerande hoeke deur hulle Antonies afgeneem. O, die ydelheid.

Moderne Cleopatra

Ek en Archie sit heerlik vir die baaiers en kyk. Ons het nie geweet ons mag swem nie en het nie ons swembroeke saamgebring nie. Archie het voorgestel dat ek in my onderklere moet swem, maar ek het hom net ’n vuil kyk gegee. Ons verkyk ons aan ’n man met ’n “hemp tan”. Almal swem, jonk en oud, mooi en lelik, vet en maer.

 

"Raai van watter land kom hy vandaan?"

Na ’n genotvolle uitstappie gaan ons terug na Maja, wat soos gewoonlik rustig op haar pos effe ronddraai. Die toerbote verlaat die baai en dit word ons eie. 

Die dag is verby. Die son is ’n vlammende geel-oranje bal wat groet en stadig agter die berg wegsak, met net soveel grasie soos wat hy vanoggend sy veskyning gemaak het.

Dis dag ...

... en die vlammende geel-oranje aand

Çökertme Prag

12 Mei 2015

Dis die volgende dag. Ek word uit die bed geboender omdat die son skyn en Archie wil gaan stap daarvoor reën. Koffie word gedrink en toe is dit regmaak vir voet aan wal sit. Gewapen met stapstok klim ons in Dinkie en ou Arch trek daai enjin oop en ons jaag land toe.

Die stap is heerlik. By ons skyn die son, maar daar in die verte lyk dinge maar dik. Die staptog begin langs die see. Toe stap ons padlangs berg-op. Ons word beloer deur ’n koei wat ons diep in die oë kyk. Ek dink hy lyk anders as Dirk se koeie op die plaas daar in die Vrystaat. 

Çökertme Baai

Eendag word ek 'n Nguni

Maja lê doer in die baai, net langs haar moeder. Sy lyk sommer piepklein langs die Aegean Clipper. Ander jagte is aan die restaurant jetties vasgemaak. Dis maar ’n klein dorpie wat bestaan uit restaurante en plasies.

Maja en haar Aegean moeder

Dorpie

Die pad neem ons boontoe en ons word ryklik beloon met uitsigte oor die baai. Die see lyk inkblou in kontras met die groen van die denne en die grysgroen van die olyfbome. 

Uitsig oor Kepçe Punt

Çökertme Baai

Ons moet soos skelms oor ’n klipmuur om tot bo te kom. Hierdie berge laat ons dink aan die Switserse Alpe. Dis wraggies baie mooi hier. 

Skelm

Olyfbome en berge

Lıttle Swıtzerland

Ons blaas die aftog en kom by Dinkie en jaag terug. Ook net betyds. Oorkant lyk die lug dreigend donkerblou met bliksemstrale wat die lug ophelder. Dit rammel in die verte en ons en die Aegean Clipper kry alles reg en vas vir die storm wat nader kom. ’n Benoude seiljag kom by die baai ingevaar en maak vinnig aan die jetty vas.

Die wind waai die donkerblou lug vinnig nader en ek word benoud. Die rammel steeds in die verte. Dit begin skielik reën en hou net so skielik op. Die storm het by ons verbygewaai. Aan die Noordekant begin die son deur te breek en die donkerblou verlig tot net bewolk en later tot amperse sonlig.

Hoe vinnig verander die weer! ’n Seiljag trek langs ons in. Ek en Archie kyk so lekker onbeskaamd vir hulle en lewer as’t ware “bal tot bal” kommentaar soos hulle al hulle aksies uitvoer.

Ons gaan vanaand vroeg slaap, want môre wil ons dou voordag opstaan, toue losmaak en voor die reën by ons volgende bestemming wees. Dit gaan net na 12:00 begin reën en dis 20 myl tot daar.

Çökertme.

11 Mei 2015.

 

Akyarlar tot Çökertme

Dit is Maandag. ’n Effe bewolkte grou Maandag. Sewe uur is ons op pad na Çökertme, 37°00.225 N, 27°47.253 O, ’n volle 24.4 myl. Die golf van Gökova is ’n ongerepte deel van die kus. Dis nie besaai met klompe huise van beton nie. Verseker is dit nie ’n betonoerwoud soos in die golf van Gülluk nie.

Rotse naby Akyarlar

Mooi berge

Ons geniet die berge en dale van die omgewing. Daar is ook ander seiljagte op die water. Gus lê nog, maar ons seil darem vir so ’n halfuur.

Oggendskoot - Toue

Berge en dale

Met die ingaan van die baai, sien ons dis ’n mooi plek. Aan die Noordekant, is die Switserse Alpe met ’n verskil - daar is olyfbome en die see. Hierdie is ’n stap paradys waar Deon du Plessis, ons vriend van Aliwal-Noord se wêreld, homself sal kan uitleef. 

Stap paradys

Hierdie is een van daai ankers met ’n “long line ashore”, wat eintlik moeilik is vir twee mense om te doen. Die boek sê:”...with bad holding at places”. Ons eerste anker is toe een daai plekke en ek trek ’n seetuin op, die alewige seegras! Ons gooi weer, die anker byt en die man van die boot langs ons in ’n dinghy, bied aan om die tou aan die land vas te maak. Archie vat nog ’n tou land toe en na ’n volle uur se gewerk, is ons eers vas. En julle dink dis vakansie!

Daar trek hy

Hou vasberade vas

Daar is belofte van reën in die lug. En nie elders nie, hier! Ons maak klaar om met Dinkie land toe te gaan, maar net toe ons wil klim, lyk dit of daai belofte waar word. Toe is ons ”all dressed up, but nowhere to go”. Ons bly maar op Maja, terwyl dit saggies reën. Daar was die enkele bliksemstrale wat my bietjie laat skrik het.

Belofte van reën ...

... nie elders nie

Ons eet heerlike boontjiebredie met murgsagte lam op ’n koue dek. Hulle voorspel reën vir môre, so die kaptein besluit om nog ’n dag te bly.

Akyarlar

10 Mei 2015.

Turgutreis tot Akyarlar

Ons het ons verblyf in Turgutreis Marina baie geniet. Dis baie beter as die vreeslike besige Bodrum. Ons koskaste is vol, die watertenk volgemaak, Maja het ’n bad gekry en die dieseltenk is opgevul. Toe roep ek op kanaal 72 vir die marina manne om ons te kom uithelp.

O ja, ek wou nog vertel het... Toe ons eergister hier by die marina ingekom het, vra die marina manne op die bootjie doodluiters vir ons ’n “rope for mooring”. ??? Geen marina het nog ooit vir ons so absurde ding gevra nie! Dadelik op my perdjie vra ek vir Archie: ”Nou wat de moer wil hulle met ’n tou maak?" Hy maan my toe tot kalmte en beter taalgebruik en sê ek moet sommer die tou gee wat ons gebruik het toe ons diesel ingegooi het. Ek gooi vir hulle die tou en daar trek hulle met tou en al en beduie ons moet wag. Ons wag tot hulle terugkom en beduie ons kan maar kom. Ou Arch vaar sommer die hele pad agteruit na ons staanplek toe. Hy sê dis baie makliker. Die marina verwag dat jy jou eie snoettou moet gebruik om aan hulle onderwater “mooring block” vas te maak. Hulle het dus, terwyl ons moes wag, ons tou aan hulle blok vasgemaak. Archie tru in ons spasie in, hulle gee vir my die tou en ek maak vir Maja vas.

Dis hoekom die marina ons moet kom losmaak. Ons is vas aan hulle blok.

Turgutreis Marina

Ons het ’n baie kort dag vandag na Akyarlar, 36°57.845 N, 27°17.645 O, net 4.7 myl. Ons is nie haastig nie, want ons moet eers vir Leon en Dirk 3 Junie in Marmaris kry. 

Catalada Eiland

Hulle vaar ook

Ons vertrek eers 10:30. Daar is nogal baie seiljagte op die water. Sommer gou is ons daar. Dis ’n mooi baai en ek gooi anker, staande met die druk van ’n knoppie, met die nuwe pendant (die Afrikaans vir pendant is blykbaar pendant). En hier is ons!

Akyarlar

Dit lyk na reën. Hulle het ook reën voorspel vir vandag. Die wolke lyk dreigend en die lug rammel. Enkele weerligstrale word aarde toe gestuur. Dit reën elders en later ook by ons.

Dit reën elders

 

Gelukkige Moedersdag aan alle moeders van Moederaarde.