Trizonia, nee Nafpaktos.

 18 September 2015. Vrydag. 

Trizonia tot Nafpaktos

Ek sê weer – ons loop die eiland omtrent plat. Vandag loop ons na die oostekant van die eiland. Ons kyk neer op Maja waar sy in die marina langs die kaai vasgemeer is. Die kaptein kyk na die toneel onder hom met hartseer in sy oë. Die jagte wat heerlik rustig en geduldig in die water lê, wagtend vir die kaptein om die opdrag te gee dat sy moet vertrek. Die seilers wat op hulle jagte doenig is met die een of ander reparasie. Die seemeeu wat in die lug sweef. ’n Vissersbootjie wat see toe gaan met die hoop op ’n goeie vangs. Die seiljaar is amper verby.

Trizonia Marina

Hartseer kaptein

Ons voltooi die staptog en gaan wag by die hawe op die klein taxi boot wat ons na Glifadha aan die hoofland se kant toe vat. Ons wil die tipiese klein Griekse dorpie gaan besigtig. Ons klim en die kaptein jaag oorkant toe. In ’n japtrap is ons in Glifadha.

Trizonia se hawe

Glifadha

Ons stap verby twee ywerige manne wat besig is druiwe te pars om retsina te maak. Dit stink te lekker na vrot druiwe en ek kan al die slegte lekker retsina op my tong proe! Die manne glimlag van oor tot oor. Baie in hulle skik met die belangstelling wat ons toon.

Wynmakers

Nou is ons haastig terug Maja toe, want ons wil vandag nog na Nafpaktos toe gaan, 38°23.467 N, 21°49.934 O, 13.5 myl. Trizonia was lekker, maar nou is dit klaar. Ons maak toue los en daar vertrek ons op ons voorlaaste dag. Dit gaan heerlik wees om vanaand weer op anker te wees. Of dit rustig gaan wees, sal ons maar moet sien.

Gus waai maar, maar gelukkig nou meer uit die noorde. Ek het al vergeet hoe mooi Nafpaktos is. Ons was verlede jaar hier. Die kasteel en sy muur staan nog trots. 

Navpaktos

Nafpaktos kerk

Aan die ander kant van die baai, spog ’n Grieks-Ortodokse kerk met sy torings. Ons bly maar op Maja, want ons is nie lus om in die wind met Dinkie land toe te gaan nie. Ons swem vir oulaas in die see en ek probeer dit baie intens beleef, sodat ek die gevoel van die blousel-blou water op my lyf saam huis toe kan neem. Die kaptein is baie bly dat ons ons laaste aand op anker deurbring.

Ou Gus waai maar heelnag, maar ek is heel gerus. Ek het gesien hoe daai anker vasgebyt het.

Trizonia. Dag 3.

17 September 2015. Donderdag.

My kaptein en ek

Ons loop hierdie eiland plat. Vandag stap ons die 1 400m roete na ‘n antieke toring toe. Dis hoër as gister se roete. Die kontras tussen die vars groen van die bome en die blou van die see is verfrissend mooi. Harmonie sit verskuil in die kontras. Oorkant lê die dorpies, kleiner as gister. Sulke popspeel huisies.

Loop eiland plat

Popspeelhuisies

Die oorblyfsels van die antieke toring is nêrens te sien nie, maar ons gee nie om nie. Die stap, die vêrgesigte, die grysgroen olyfbome is vir ons genoeg. Die sintuiglike ervarings van sien, hoor, ruik hier in Trizonia, waar ons vasgevang is, is voedsel vir my siel. Ek sal aansoek doen om hier vasgevang te word.

Grysgroen olyfbome

Uitsig

Ons stap terug en gaan sit en sweet op Maja. Hemel, die hitte wil nie weggaan nie. Trizonia se onklaar marina is vandag stampvol, hier is nie plek vir ’n muis nie. 

Archie raak verveeld. Toe haal hy die stoof uit. Sy oonddeur wil mos nie mooi toemaak nie. Al die skroefies en moertjies word met sorg en soms met moeite uitgehaal. Die oonddeur se veer is toe die sondebok en Archie maak korte mette met die ou probleempie. Dis sommer ook nog een ratel minder as Maja skommel. Soos die Grieke sou se: "Bravo, Archie!" Ons sien hoe vuil is daai stoof en maak dit deeglik skoon. Nou hou dit nie meer 'n gesondheidsgevaar vir ons in nie.

Maak stoof reg

Archie neem my vanaand uit vir ete. Dis nou al my derde jaar hier in Griekeland en ek het nog nooit hier mousaka geëet nie. Wel, vanaand is die aand. Ons klim ewe opgedress van Maja af en stap so half in gelid met Switsers na die taverna toe. Ons raak aan die gesels en eindig saam met hulle aan dieselfde tafel en luister na al hulle seilplanne. Hulle is op pad na Gibraltar en daarna die Kanariese Eilande om die Atlantiese Oseaan te kruis. Ek kan sien Archie se oë blink. Hy wil dit ook eendag doen, maar ek stel glad nie belang om dit te doen nie.

Ons neem afskeid van hulle om hulle nooit weer te sien nie. Ek is nou al gewoond aan koebaai se.

Archie sê ek maak lekkerder mousaka as die taverna.

Trizonia. Dag 2.

16 September 2015. Woensdag.

Vasgevang in op ’n Griekse Eiland!? Hoe erg kan dit nou wees? Ek kan aan erger dinge dink. Vasgevang in die spitsverkeer tussen Johannesburg en Pretoria! Tussen hope skoolboeke om te merk! Agter slot en grendel in jou eie huis! Ons vriend Deon van Aliwal-Noord se wêreld is reg. Ons kla met die witbrood onder die arm.

Ons gaan stap die 1 600m roete na Kaap Kochylas. Ons sien die hoë berge oorkant op die vasteland. Klein dorpies lê knus en snoesig aan die voete van die berge. Vissersbootjies kom en gaan met die vissermanne wat hul daaglikse brood vang. Die wonder van die eenvoud tref my tussen my oë. Ons is deel daarvan, midde-in die eenvoud. Maak oop jou oë en waardeer wat aan jou gebied word. Die vasgevang word vrygelaat!

Roete na Kaap Kochylas

Lekker stap

Die see lê blousel-blou aan albei kante van die eiland. Olyfbome lyk of hulle sommerso wild groei. Nie omdat hulle moet nie, omdat hulle wil. Trizonia is ’n pragtige eiland. Ek en Archie geniet die stap terdeë en is baie dors. Dis baie warm hier en die Kalypso Taverna lok ons nader. Ek drink ’n freddo cappucino en Archie ’n yskoue bier waarvan die beker as’t ware gevries is.

Olyfbome

Kalypso Taverna

Ons stap tevrede terug na Maja. Archie en ons jong Switserse bokkie-buurvrou help die nuwe kaaibewoners om vas te meer. Toue word gegryp en vasgemaak, doelgerig en doeltreffend.

Trizonia dorp en marina

Maak toue vas

Hier in Trizonia gaan dit nog baie lekker word!

Trizonia.

15 September 2015. Dinsdag.

Panormou tot Trizonia

Die oostewind waai nog steeds. Nie sterk nie, met genoeg vir swellings. Waarheen nou? Hier is nie baaie wat reg is vir oostewinde nie. Ons vertrek uit die baai en daar is weer van die pragtige gebakte eier jellievisse. Hulle is vir ons baie mooi. 

Jellievis

Jellievis

Kallithea is die eerste baai op ons lys. Daar is ’n klein eilandjie met ’n kerk in die baai. Ons vaar rond vir ankerplek. Die boek jok vreeslik oor die diepte. Dis baie dieper hier as wat die boek sê en glad nie beskut teen die oostewind nie. Die baai word te lig bevind en ons vaar verder. Archie is bietjie teleurgesteld, want hy wou baie graag hier anker. Hy hou mos vreeslik van anker. 

Kallithea Baai

Ons vaar na die volgende baai toe, maar dis te diep en te oos. Dis dieselfde met die volgende baai. Ons kry net nie ’n baai wat reg is nie en toe moet ons maar na Trizonia, 38°22.131 N, 22°04.618 O, 11.6 myl, gaan. Ons is glad nie voorbereid om alongside te gaan nie en die toue en fenders word in gereedheid gebring. Gelukkig is daar iemand op die kaai wat help en ons is vas en veilig in Trizonia. Dis ons voorland vir die volgende paar aande. Ons het geen ander heenkome nie.

Trizonia Marina

Ons gaan stap ’n ent in die dorp, maar ons voel afgehaal omdat ons ons laaste dae van die seilseisoen in ’n halfklaar marina moet deurbring. Ons moet eers Saterdag in Patra wees. Die kaptein se hart is baie seer en ek kan niks doen om hom op te beur nie. Ons is vasgevang in Trizonia. Gelukkig is dit baie mooi hier, want hier sal ons onsself moet besig hou vir vier dae.

Trizonia hawe