Phaselis.

30 Augustus 2018. Donderdag.

Kemer tot Phaselis

Toe is dit amper tyd. Tyd om die Franse Kanadese, Yvon en Louise, welkom te heet. Maja is slaggereed vir hulle koms en ons ook. Ons stap na die veerbootkaai.

Dis tyd vir die gaste om van Antalya te kom, maar dis ook tyd vir al die gulets in die marina om met al hul plesier- en sonsoekers om te vertrek. Ons kyk na die bedrywigheid op die kaai. Die reuse gulets lyk soos seerowerskepe en hulle verlaat een vir een. Die marina man in sy dinghie, help stoot hul in die regte rigting. Harde Russiese musiek word oral op die gulets gespeel. Daar is mos hoeka baie Russiese toeriste aan boord.

Gereed vir die besoekers

Gulet vloot

Viking

Gulet vertrek

Toe kom die veerboot en daar is Yvon en Louise. Lekker om hulle weer te sien. Die arme goed kry so warm. Hulle kon mos van Quebec se wêreld en dis mos nie so warm daar nie.

Ons stap na Maja en hulle loop die plank."Welkom aan boord, julle!" Hulle gaan verken gou die plek, ons eet iets en toe is dit tyd om Kemer Marina te verlaat.

Hulle is hier

Archie, Yvon en Louise

Yvon loop die plank

Louise volg

Ons gaan vandag na Phaselis, 7.4 myl. Dit is mos 'n antieke stad. Oral in die baai is oranje boeie. Grotes. Ek skuif agter die helm in, en Archie en Yvon staan gereed om die boei te gryp. Maar hy is swaar. Dit ruk amper die boothaak uit sy hand uit.

Archie besluit om die boei aan die agterkant van die boot te gryp. Hy stuur Maja sekuur op die boei af. Yvon staan gereed met die tou. Toe Archie by die boei is, sit Yvon vinnig die tou deur die ring. Toe trek hulle die boei na Maja se snoet en maak haar vas. Wat 'n geluk! Ek hoef nie eers anker te gooi nie! Toe verdien ons daai koue drankies!

Naby Phaselis

Nooiensvaart

"Cold beverages"

Toe gaan besoek ons die antieke stad, Phaselis. Dis nogal 'n ding om droogsboud in Dinkie in die golwe by die land te kom. Archie vat eers vir Yvon en Louise en kom haal daarna vir my.

Boud natmaak

Die stad het in 690 v.C. ontstaan deur koloniste van Rhodes. Dit het gegroei tot 'n vooruitstrewende handelstad, met drie hawens, waarvan die oorblyfsels vandag nog te sien is.

Die plek was bekend vir sy ligte, vinnige seilbote, die phaseli. Ongelukkig is daar nie voorbeelde of illustrasies van die vaartuie nie.

Ons stap deur die ouwêreldse stad en sien baie hedendaagse bruidspare. Skitterwit tussen die klippe. Ons kyk na die badhuise, ou geboue en die teater. Die denkers dink ook nie nou se dae so diep( soos verlede jaar) in die antieke teater nie.

Klein badhuis

Aquaduct

Aquaduct

Piekniek tussen die ruïnes

Gifappeltjie

Hoofstraat

Teater

Ligsinnige denkers dink nie

Bruidspaar

Terug om Maja was daar 'n effense stort insident wat Yvon insluit, en Archie moet die probleem eers weer "fix", maar gelukkig kén die kaptein mos van goeters fix. En reg is die buitestort weer.

Yvon

Ons eet heerlike groenboontjiebredie. Die Kanadese is moeg en ons gaan kruip in. Wat 'n heerlike dag!

Kemer Marina.

28 en 29 Augustus 2018. Dinsdag en Woensdag.

Çineviz tot Kemer Marina

Dit lyk seker of ons vreeslik lui geword het. Vaar van die een plek tot die ander en klim dan nie eers van Maja af om die omgewing te verken nie! Om nie eers van die kort blogs te praatjies nie.

Die rede daarvoor is eenvoudig. Ons laai ons Frans-Kanadese vriende in Kemer op en dan gaan ons in ons spore terugvaar. Al die mooi plekke waar ons nou was, gaan ons weer besoek en saam met Yvonne en Louise verken.

So vandag vaar ons na Kemer Marina, 16.5 myl. Die wind is kalm, maar in die groot baai, is daar 'n sikloon en wind van 15 knope waai skielik van voor vir so sewe myl. Toe is ons uit die sikloon en dis weer stil. Dis nog baie bewolk, maar ons weet nou dis maar hoe dit in die geweste in die oggende is. Later verdwyn die wolke en dit word weer sweetwarm vir die res van die dag. Ek is amper permanent blinknat gesweet.

Bewolk

Seil 'n bietjie

Naby Kemer kom die 10:00 gulets almal van voor af gevaar om die plesiersoekers van baai tot baai te neem om hoofsaaklik te swem. Om die draai en daar is Kemer Marina met die reuse berge in die agtergrond.

Gulets

Gulet by grot

Watersport

Ons gooi eers diesel in en pomp swartwater uit en toe neem die marinaman ons na ons tuise vir twee nagte.

Dis nou weer die gewone prosedure. 'n Nuwe bemanningslys moet gekoop word en die nuwe gaste moet daarop geplaas word. Maja word geskrop, wasgoed en beddegoed word gewas. Voorrade word aangekoop en vêr gedra. Dis net werk werk werk. Archie sê mos hoeka altyd: "'n Huisvrou se werk is nooit klaar nie."

Kemer Marina

Gulets in die marina

Kemer Marina

Donderdag kom Yvon en Louise. Ons sien vreeslik uit daarna.

Çineviz

27 Augustus 2018. Maandag.

Çavus Limanı tot Çineviz

Dis net 'n hanetree na Çineviz, 7.5 myl. Ons trek die anker op en vertrek vreedsaam en minsaam na ons volgende bestemming. Die onmin is darem uit die weg geruim.

Die kuslyn is pragtig en indrukwekkend. Dié deel van Turkye word gekenmerk deur mis wat in die nag oor die hoë Tauris berge sluimer en oggend wolke wat dan daaroor vorm. Die bestemming kom vinnig nader. Ons kyk eers na suidbaai, Sazak Limanı, maar ons besluit dat die noordbaai, Çineviz, baie mooier is en gaan gooi daar anker.

Sazak Limanı

Sazak Limanı

Ons deel die baai met toerbote en gullets wat kom en swem en dan weer gaan en toe dit aand word, is hulle almal met plesiersoekers en al vort.  Ons is die enigste jag in die baai. Die enigste ander mense hier is vistermanne wat hier bly, maar meer soos plakkers lyk.

Ons is nou 'n dagreis vêr van Kemer af, waar ons vir Yvon en n Louise gaan kry. Ons is mos deesdae lui en die aand eet ons heerlike lui-kos, wat sommer net in 'n bord gesit word. Heerlik!

Aandete

Çavus Limanı.

26 Augustus 2018. Sondag.

Gökkaya Limanı tot Çavus Limanı

Vandag was glad nie 'n lekker dag nie. Ons vaar 38 myl na Çavus Limanı toe. Ek en die kaptein kon net nie ooreenkom waarheen ons moet gaan nie. Daar was onmin op Maja.

Vroeg-oggend by Gökkaya Limanı

Kuslyn

Ingang tot Çavus Limanı

Çavus Limanı.

Gökkaya Limanı.

25 Augustus 2018. Saterdag.

Üçağız tot Gokkaya Limanı

Ons vaar verby Kale Köy met sy pragtige kasteel op pad na Gökkaya, 4 myl. Die ou kasteel van Kasteel Baai lyk vir my maar baie eensaam. Sommer gou is ons by Gökkaya. Die baai is gewild, want hier is baie jagte wat die besonderse plek as 'n tuiste gebruik.

Kale Köy

Kale Köy

Kasteel Baai

Gökkaya Baai

 

Ons ontspan sommer heeldag op Maja. Swem, boeklees, gesels.

 

Die aand is dit weer een van daai "Maja Magic" momente. Gus waai baie liggies. Die son sak vroeg agter die berg en die wêreld sug soel en salig as die ergste hitte verdwyn. Die koeëlronde geel maan neem die son se plek in.

Hy glimlag geheimsinnig en glinster sy glim-gloed op die stilswye van die spieëlgladde baai. Êrens lag kinders en grootmense gesels. 'n Klokkie lui op 'n gullet om 'n avondmaal aan te kondig. Alles leefgeluide in die mooi Gökkova, waarvan ons tweetjies op Maja deel is.

 

Glimlag geheimsinnig

Üçağız Limanı.

24 Augustus 2018. Vrydag.

Kaş Marina tot Üçağız Limanı

Die marina man word oor die radio geroep en hy staan ons by met die losmaak van die snoettou en neem ons toegangskaart in en weg is ons na Üçağız, 20.8 myl.

Op 'n stadium motorseil ons, maar die wind is maar min. Ons is eintlik op pad na Kemer, waar ons vir Yvonne en Louise, die Franse Kanadese, gaan oplaai. 

Ons sien 'n uitsonderlike skouspel wat ons asems wegslaan. 'n Groot tuna, so 1,5 m groot, spring ongeveer 2m met 'n boog uit die water uit agter 'n vis aan. Die knewel spring nie een keer nie, nee twee keer, in die lug. Dis 'n pragtige vis. Ons het nie besef hier is sukke groot tunas in dié geweste nie. Wat 'n gesig!

Ons vaar by Kekova in en wil eers by Woodhouse Bay probeer anker, maar dis net gullets waar jy kyk. Hier is nie plek vir 'n muis nie!

 

"Full house"

 

Toe gaan ons maar na die getroue Üçağız toe en gooi daar anker. Dis 'n bedrywige dorpie die. Toeriste net waar jy kyk.

 

Üçağız Baai

Kaş Marına en Kastellorizon

22 en 23 Augustus 2018. Woensdag en Donderdag.

Bayındır Limanı to Kaş Marina

Vandag gaan ons na Kaş Marina, 7 myl, vir twee dae. Ons moet na die Griekse eiland, Kastellorizon toe gaan, sodat ons nuwe Turkse visums vir die volgende 30 dae kan kry.

Ons trek die anker op en vaar terug na Kaş Marina, verby die rotse wat sommer so in die see staan. Die marina se personeel is uitstekend! Ons pomp eers swartwater uit en toe vergesel hy ons na ons plek in die marina, B 21. Hy spring self op Maja en maak die snoettou vas. Woeps, is die agtertoue vas en ons word met die hand gegroet en welkom geheet.

Oggendskoot - Geïsoleerde gevaar

Archie gaan koop dadelik veerboot kaartjies vir die volgende dag en toe is ons reg vir Kastelorizon. 'n Eiland wat my aan Symi laat dink. Kleurvolle huise wat vriendelik langs die see en teen die berg-op glimlag deur hul vriendelike vensters. Daar vind baie bemarking plaas, want hulle wil al die vervalle huise verkoop en die nuwe eienaars moet dit restoureer.

Meermin en haar dolfyne

Geraamte

Kastellorizon

Kastellorizon

Kastellorizon

Ons stap rond en eet by 'n restaurant waar die groot waterskilpad vreeslik lief is vir die mense se garnaalkoppe wat in die water gegooi word. Die groot ou vraat eet hom omtrent dik aan die garnale! 

Restaurant

Skillie

Archie se plakkie maak hom seer en hy sit op 'n bankie en boek lees, terwyl ek in die hitte rondstap. Nog steeds is die hartseer St George kerk, wat in die 19de eeu gebou is, daar. Verwaarloos en treur huil-trane deur sy gebreekte venster oë met stukke splinter glas, oor wat was, wat is en wat sal wees. En ek treur saam. 

Hartseer kerk

Kerk binne

Ek stap verder. En my siel word gelaaf deur die uitsig op die pragtige baaie waar jy kan nesskrop in turkoois water en 'n klomp jagte staan hier (wettig of onwettig) op anker. Ai, dis 'n mooi eiland hierdie!

Baai

16:00 vat die veerboot die pad terug na Turkye en ons is wettig vir die volgende dertig dae. Kaş Marina is pragtig én ons kry 60% afslag omdat dit een of ander godsdienstige vakansiedae is. 

Kaş Marina

Bayındır Limanı. Kaş.

20 en 21 Augustus 2018. Maandag en Dinsdag.

Yeşilköy Limanı tot Bayındır Limanı

Maja se waterprobleem het baie erger gelyk as wat dit was. Archie doen 'n tydelike herstel van  die probleempie in omtrent vyf minute, totdat hy in Marmaris 'n nuwe part kan kry. 

Ons trek anker op en vaar die 14.8 myl na Bayındır Baai by Kaş. Dis mooi hier en ons vleg deur die eilandjies en vlakker plekke. 

Ek leef in 'n wêreld vol van skilderye. Van verskillende landskappe. Van hoë berge wat stil-stom met my praat. Van diep val-valleie, van die ewig-blou see. Van skilpad-swem en dolfyn-dein. 

Ek leef in 'n wêreld vol luister. Van water wat teen klippe klots. Van deinings wat teenaan die landskap bots. Van wind wat sag fluister, van wind wat loei, skree, raas. 

Van stil-streel see-spieëlbeelde. Van donkermaan, sekelmaan, volmaan. Van skitter-ster, van rimpel dimpel diamant.

Ons gooi twee keer anker in die baai voor hy byt, want dis weereens 'n baai met "bad holding in places". Maar toe is ons vas en die uitsig is pragtig. Daar vêr teen die berg lê Kaş. Op ons voorstoep is 'n strand vol gelukkige mense. Hulle lag en baljaar in die water. 

Ons baai

La Moda Beach Hotel

Kaş in die verte

Drie honger bytvisse knip my swem kort toe hulle op my afpyl om te begin knibbel. Dink hulle is agter die seep waarmee ek my gesmeer het, aan. Dit was so 'n bad-swem. Hulle stel glad nie daarin belang om aan die kaptein te knibbel nie. Sy vel is seker te taai!

Swem

Ons bly vir twee dae hier op anker en geniet die lewendige bedrywighede van die baai. Dis "Maja Magic"op sy beste.