Chalkisbrug – Donker vaart.

1 Junie 2016. Vroeg Woensdagoggend.

 

Chalkisbrug deurry

Minute voel soos ure, sekondes voel soos minute. En ons wag en wag op die skril stem op Kanaal 12. Toe skielik, 00:10, lewe die radio en hulle roep. Ons albei spring penorent. Archie antwoord en hulle sê ons moet gereed maak, as hulle weer roep, moet ons gaan.

Staan gereed om te gaan

Die bars stem sê skielik: ”The bridge is open. You must go!” En ons gaan. Oral staan nuuskieriges wat genoeë dááruit put om bootmense in die nag te sien vaar. Ons is nou seker wêreldbekend, want jy sien net kameras wat flits! Soos in verdomp “Smile, you are on candid camera”. (Ek het nog altyd gewonder wat beteken candid camera, ek weet nou!)

Eerste boot vertrek

Ons is derde in die ry. Die eerste jag is deur die brug en reguit kaai toe en kry ’n plek by die kaai. Die tweede jag gaan deur en kry die laaste plek. En ons!? Geen heenkome nie, haweloos. Vir die eerste keer verstaan ek werklik die term “haweloos”. Ons voorland is anker. Ons vat die donker pad en Archie volg sy GPS lyn slaafs. Ons weet dat daar in die water vlak plekke van 1m is. Dis nogal senutergend, so in die donker. Ek moet op die uitkyk wees na vissersbootjies sonder ligte, want baie klein bootjies vang in die nag sonder ligte vis.

Oral langs die see is daar geboue, so ons kan darem sien waar hou die see op en waar begin die land. Na 2.4 baie lang myle, kom ons by die Chalkis Baai, 38°28.584 N, 23°36.948 O aan. Toe gooi ons anker, dit lyk darem of hy byt en ons haal weer asem. Ek kyk op my horlosie – 01:50.

Op anker in Chaklis Baai

Moeg en verlig gaan slaap ons in ’n windstil baai.

Chalkis.

31 Mei 2016. Dinsdag.

 

Eretria tot Chalkis

Hierdie Evia Eiland waar ons nou vaar, is vreeslik groot. Ons is al met hom besig van Vasilikos Baai tot nou en vandag is dit Chalkis, 38°27.633 N, 23°35.372 O, 13.5 myl.

Naby die dorp is ’n baie groot sementfabriek en dan moet jy onder ’n hoë padbrug deurvaar. Hierdie is vlak water en ’n kaptein moet kophou om in die diep deel (7 m) te vaar. Die bevaarbare deel word onder die brug met ’n groen baken, (regs) en ’n rooi baken (links) aangedui. As jy nie die regte roete volg nie, is strand jou voorland.

Sementfabriek met brug agter

Brug, hier kom ons!

Soos gewoonlik lyk dit of Maja se mas te hoog vir die brug is, maar ek weet nou al, moenie komkommer nie (dis altyd vir my so kommin as iemand so sê), die brug is hoog genoeg. Ons is onderdeur en anderkant verby en daar lê Chalkis.

Chalkis met brug op linkerkant

By Chalkis is ’n baie nou brug wat Evia Eiland en die Griekse hoofland met mekaar verbind. Dis 39.9 m breed en die brug kan oopswaai vir hie vaartuie om deur te gaan. Die kaptein moet dadelik na die hawe polisie gaan om die brugfooie (€35)te betaal en te vra hoe laat die brug oopgaan.

Daar is seestrome van 3 tot 4 knope loop deur die nou gaping en die water kan ook vreeslik kolk. Dan is dit ook met die maan gepla, want met springgety is dit erger. As Gus erg waai, maak hulle soms nie eers die brug oop nie. En die ergste is dat hulle net die brug in die nag oopmaak. Kwansuis om die verkeer nie te ontwrig nie. Persoonlik dink ek dit is om die lewe van die bootmense moeiliker te maak en die toeskouers se lewe bietjie op te kikker.

Ons kry ’n plek langs die kaai en maak vas. Gus lê. Archie doen die nodige papierwerk. Ons moet ons radio van 21:30 op Kanaal 12 aansit, want hulle sal laat weet. Dit sal waarskynlik na middernag wees. Hemel, maar is ek benoud. Om in die middel van die nag deur te vaar en weer vas te maak, is “spectator sport”.

Langs die kaai

Ons verken die dorp. Daar heers ’n vakansie gevoel in die plek. Dis lewendig en oral langs die kaai is restaurante. Ons gaan bekyk die kaai aan die ander kant van die brug waar ons na die deurgaan wil slaap. Plek is maar skraps. Omtrent plek vir twee jagte. Daar staan reeds ’n paar jagte vasgemaak wat die meeste plek vat. 

Die berugte brug

Waterfront anderkant die brug

Ottoman moskee

Ek is nou glad nie meer mistroostig nie. Ek is doodeenvoudig benoud. Om in die dag te “alongside” is erg genoeg, maar in die nag! As daar nie plek by die kaai gaan wees nie, is die ankerplek 2.4 myl verder. Ag my swak hart!

Ek maak die laaste van die slegte calamari gaar en eet dit sommer met koue rys. Ek met nou net brug op my brein. Teen 21:30 word die radio aangesit, maar daar is ’n swanger stilte op Kanaal 12. ’n Kaptein van ’n ander jag kan dit teen 22:17 nie meer hou nie en roep die hawe polisie. Hulle sê ewe ongeduldig vir hom hy moet maar net wag. Hulle sal ons roep. Die dowwe aand word donker nag. Gelukkig brand die dorp se ligte en ons kan sien.

Wanneer gaan hulle ons roep. Dis al amper middernag! Daar is drie bote wat wil deurgaan …

Eretria.

30 Mei 2016. Maandag.

Vouvo Baai tot Eretria

 
Daar is ’n mistroostigheid in Griekeland hierdie jaar. Die landskappe is skaam en sku en skuil onder ’n hand met verswelgende misvingers wat geen troos bied nie. ’n See waar Gus koning kraai. In hierdie een maand het ons meer wind gehad as die hele seilseisoen van 2015. En die kaptein beaam dit. Gus is heeldag en aldag met die wolke doenig. Hy rol hulle voor die son in, waai mis oor die baaie, dryf dynserigheid in die dorpe. Hy verskuil die son en versondig my siel.

Die see weet ook nie herwaarts of derwaarts nie. Dan dein hy suid, dan dein hy noord en dan wes. Baie selde oos. En ons dein saam. En ons seil saam.

Vandag gaan ons na Eretria, 38°23.282 N, 23°47.874 O, 17.2 myl. Dis dynserig. En Maja se enjin verander van klank. Archie skakel dadelik die enjin af. Ons ken die roetine nou al. Kry die snorkel en bril en duik onder Maja. En siedaar! Weer ’n stuk plastiek om die propeller. Dis ons vierde seiljaar en nooit het Maja plastiek ingesluk nie. En nou in een week sommer twee keer. Ons seil darem vir 2h15min met ’n lekker agterwind.

Propeller skoonmaker

 
Eretria is maar net ’n dorp met ’n veerboot hawe. Dis nie mooi nie, dis nie lelik nie. Dit is maar net. Die gebied tussen die Griekse hoofland en die eiland Evia wil net nie op my groei nie. Ek kan net nie een word met die omgewing nie.

Eretria Baai

Veerboot hawe

Vir Chris en Zané - "Pole dancer"

Ek wil ons vriend Deon en sy vrou Ryna, van Aliwal-Noord se wêreld, vra om vir my ’n literêre verfkwas saam te bring, dat ek weer mooi kan skryf. Die inspirasie ontbreek, die woorde wil nie kom nie.

Ek maak vir ons calamari en rys vir aandete. Die rys is kluitjie en die calamari is bleek. En ek kan nie eers wyn drink nie, want ek drink deesdae net oor die naweek.

Gus gaan lê en ek gaan na droomland waar al my wense waar word.

Vouvo Baai.

29 Mei 2016. Sondag. 

Alymropotamos Baai tot Vouvo Baai

Vandag word die Comades Marathon in Suid-Afrika gehardloop. Ongeveer 20 000 atlete het ingeskryf. Die deelnemers moet 89.9 km in twaalf ure voltooi om te kwalifiseer vir ’n medalje. Vanjaar is die af-wedloop vanaf Pietermaritzburg na Durban.

’n Kort seildag wag vir ons. Ons gaan by Vouvo Baai 38°17.145 N, 24°6.716 O, 6.5 myl, teen die suidewind wat vanmiddag kom, skuil. Ons vaar uit ’n baie windstil baai.

Die Grieke is baie lief vir hulle kerke, want daar is ’n splinternuwe kerkie by die visplaas gebou. Nou het visplaasmense nie verskoning om nie kerk toe te gaan nie. Ons is sommer gou by ons bestemming en toe is dit net Comrades op die internet.

Visplaas regs van uitgang

Visplaas kerkie

Vouvo Baai

My swaer Fanie, 54, hardloop sy eerste wedloop. Die kaptein stel vreeslik belang in Fanie se vordering, want hy het op sy dag self 14 Comrades gehardloop. Hy gaan op die Comrades se webwerf in en hou Fanie se vordering dop deur te kyk wanneer hy deur die kontrole punte gaan.

Die hele familie hou hom dop en lewer verslag op WhatsApp. Dwarsoor die wêreld stort ons susters en skoonsusters oorstelp trane as die oomblik te groot word. Almal hou styf duim vas en huil verlig saam toe hy voor afsnytyd die wedren voltooi.

Fanie in volspoed

Die familie tuis, die klomp in Durban op die toneel en ons in Griekeland vier saam fees, al is ons nie bymekaar nie. Archie klink ’n glasie op Fanie en ek klink saam.

Op Fanie

Cheers, Fanie

Baie geluk, Fanie!

Gus sal na gerugte om middernag gaan inkruip.