Kemer. Tata Maja!

20 September 2016. Dinsdag.

 

Ek word wakker deur druppels wat teen die luik val. Soos blits spring ek op, want daar is wasgoed op die draad. Dit reën liggies. Dit was die afgelope tyd so vrekwarm, gedog iets gaan uitbroei. Dis nou net jammer die bimini is nou nat en dit moet nog afgehaal word.

Die reën hou nie lank aan nie. Toe dit ooptrek, is daai berge eers mooi. Een vir een word die pieke deur die son verlig. (Die berge roep my, ek sal volgende jaar moet gaan hoor wat hulle vir my wil sê.) Die marina skitter in die son en alles lyk vars. 

Vars na die reën

Gulets staan gereed

Die bimini word gelukkig drooggebak en ons haal dit gou af voordat die volgende buitjie val. Archie haal ook die helm af. Ek hang die wasgoed weer op en toe dreig die reën om weer te val. Wasgoed op, wasgoed af. Dis een van daai dae. Nou hoop ons net die reën hou op voor vanaand. Ons is nie lus om in die reën na die bushalte toe te loop nie! Ons gaan vanaand die bus klim na Göreme.

Reën in die lug

 

Archie doen nog vir oulaas goedjies en maak seker daar is nie toue wat in die wind gaan klapper nie. Maja is nou behoorlik kaalgestroop! Sy lyk vir my skoon olik.

Maak toue stil

Kaal gestroop

Ons pak ons rugsakke en ons is reg vir die lang pad. Die luike word deeglik toegemaak, alles word dubbeld gekontroleer, ons sluit die deur en groet vir Maja.

En daar trek ons. Nog is seisoen is verby. Ek kyk om en met ’n laaste “tata Maja” en ’n traan in die oog, stap ons weg van ons geliefde Maja wat so eensaam en verwese op haar stelte lyk. 

Tata Maja

 

Archie verrek ’n spier, of iets …

Kemer. Maja hoog en droog.

19 September 2016. Maandag.

Vandag word ons huis op droë grond geplaas. Alles is reg en ons wag vir die marinamanne om ons te kom tou. Nee, Maja is nie stukkend nie, haar enjin is klaar gewinter en daar mag nie seewater in haar pype kom nie.

Die manne kom en een stoot vir Maja met sy groot dinghie en die ander een vat die helm by Archie oor en so kom ons by die uithaalpunt. Die ou groot uitlugmasjien staan klaar gereed met sy bande (straps). Hulle stuur Maja netjies tot bo-op die bande en ek klim af. Die kaptein is nog aan boord om die een en ander te doen en toe klim hy ook af. En die ou grote doen sy werk en die bande word sekuur onder Maja se romp geplaas en haal haar, soos Moses van ouds, uit die water. Ek pik ’n traan en later toe ek vir my suster, Elize, ’n foto van Maja op haar stelte stuur, pik sy ook ’n traan.

Stoter

Nuwe stuurman

Kaptein gee laaste tou aan

Maja verlaat die see

Die man met sy hoë druk water afspuitmasjien spuit met 'n fors om die seetuin van Maja se romp af te kry.

Maja se seetuin

Dan vat die geel masjien oor. Die ou grote sit haar netjies op die gele neer en sy word aangery na haar staanplek. Alles word beveilig en sy word gestut met staal en houtstompe. En daar staan sy, soos ’n penthouse in die lug. Hulle bring vir ons ’n staal leer en ons klim.

Sit netjies op geel masjien

Op pad na staanplek

 
Ek loop maar liggies op haar, want dit voel of sy wil omval. As ek na die bote in die water kyk, voel dit of Maja beweeg en nie hulle nie. Dis ’n vreemde gevoel.

Nou moet daar net nog ’n paar goed weggebêre word, dan is alles gereed vir ons vertrek na Goreme, môre-aand 20:00. 

Hoog en droog en reg vir die winter

Kemer. Nuwe vriende.

16 tot 18 September 2016. Vrydag tot Sondag.

Wat ’n luukse! Elke aand ’n stort waar ek sommer baie water kan gebruik. Ons is nou behoorlik silwerskoon en ruik te heerlik.

Ek en Archie is elke dag besig om dinge op Maja agtermekaar te kry vir die winterslaap. Alles moet gewas word. Die matte word gewas, Maja word gestofsuig en alle skoon goed word in plastieksakke toegemaak en weggesit vir die winter. Die lyne is elke dag vol wasgoed.

Archie haal die toue af en laat dit week in vars water. Dinkie word gewas en ek skrop die fenders. Oliefilters en dieselfilters word vervang. Die seewater verkoeling sisteem word met vars water uitgespoel.

Toue week in Dinkie

Die toiletklep het vandag besluit om te breek en uit die sweet van sy aangesig maak Archie dit ook gou reg. Nie so gou nie, want na 'n lang gesukkel en is dit uiteindelik reg.

Maak toiletklep reg

 
So is ek nog so besig tussen die stofdampe toe Archie my roep van buite af. Hier staan hy met ’n vroumens wat hy êrens opgetel het. Sy glimlag breed. “Dis Annemarie”, sê hy. Sy het gesukkel om van hul boot af te kom met ’n sak wasgoed, toe help die ridderlike Archie haar. Sy vra toe waarvandaan hy kom en wil jy nou meer! Hulle kom toe ook van S.A. af en nogal van Krugersdorp.

Wel, so ontmoet ons toe vir Brian en Annemarie Glover van Suid-Afrika. Dis ’n oor en weer geselsery en hulle nooi ons om die aand saam met hulle by Has Kebap Restaurant te gaan eet.

Archie moet olie gaan koop en dis vêr soontoe. Brian verduidelik waar die motorhawe is en leen sommer sy fiets vir Archie. En daar trek hy en trap dat dit so bars om sy inkopies te gaan doen. Hy lyk goed met die fiets. Dit pas hom.

Dorp toe

 
Die aand 19:00 stap ons na die restaurant en eet heerlik. Annemarie eet ’n hoender kasserol en ons ander eet hoender steaks. 

Pofbrood

Annemarie en Brian Glover

 
Die volgende dag is dit weer net werk werk werk. Ons nooi hulle die aand vir ete. Ons is op die laaste van ons voorrade en ek maak heerlike pasta en pesto, met ’n groot bak slaai en jellie as nagereg. Wat ’n gesellige aand.

Vriende op Maja

 
Die volgende vertrek hulle en dis koebaai. Ons sal hulle volgende jaar weer sien, want hulle oorwinter ook in Kemer.

Koebaai. Sien volgende jaar.

Antalya.

15 September 2016. Donderdag.

Vandag besoek ons Antalya. Ons klim die bus en daar trek ons en ry tussen baie mooi berge.

Antalya was gestig deur Koning Attalus II in 158 v.C. Hy het net vir ’n kort tyd regeer en die stad is oorgeneem deur seerowers. Daarna het die Romeine die stad regeer en dit het ’n belangrike hawe geword.

Die Selçuk Turke het Antalya in 1207 oorgeneem. Die “Fluted Minaret” wat langs die hawe geleë is, is ’n perfekte voorbeeld van die Selçuk argitektuur. 

Archie met "fluted minaret" in agtergrond

Ou Hawe

Ou Hawe

Die Ottomans het in 1387 die stad oorgeneem. Na die Eerste Wêreldoorlog, het Italië dit oorgeneem, maar in 1921 het Atatürk se weermag die stad oorgeneem en dit het die hoofstad van die Antalya Provinsie geword.

Vir die meeste besoekers is dit heerlik om net in die besige strate rond te dwaal en te verdwaal. Die oustad se geboue is meestal gerestoureer en goeie voorbeelde van Griekse en Ottoman argitektuur.

Hawe met ou stad se muur

Sambreel straat

Groot bonsai

Ek en Archie dwaal in die Kaleiçi (ou dorp) rond en geniet die gesellige atmosfeer wat die oustad vir ons bied. Baie gulets en ekskursie bote neem agies op daguitstappies om die mooi Antalya se kus te besoek.

Ekskursie boot

Unieke boumateriaal

Kesik Minare ("Truncated Minaret")

"Hadrian's Gate"

Hıdırlık Kalesi (Ligtoring)

Romeinse tempel

Ons vaar met die seebus terug na Kemer en word beloon deur die mooiste sonsondergang wat ek deur die seebus se vensters verewig. Wat ’n heerlike dag.

Seebus

Sonsondergang