Patra. Nuwe gaste.

14 Junie 2014. Saterdag.

Dirk en Rika daag op terwyl ek 'n middaguiltjie knip. Ek skrik gelukkig wakker voordat hulle my op heterdaad betrap.

Hulle reis lig en kom met klein tassies aan. Oor die plank en hulle is aan boord. Hulle het varsprodukte saamgebring. Gawe mense, die Groblers.

Rika en Dirk Grobler

Ons gaan die aand na 'n sangaand toe. Dit klink meer soos Aspoestertjie se stiefsusters wat sing. Soos musiek wat pas 1001 Arabiese nagte. Die een man speel een van daai instrumente wat die slange krullerige dansbewegings laat doen.  Niemand kan hulle daarvan beskuldig dat hulle 'n engelekoor is nie. Hulle klink meer soos sangers wat op my sangaande moet sing, dis nou die sangaande wat Archie so vrees. Om op te som - dis nie so mooi nie.

Sing hulle harte uit

Ek verkyk my aan die sangers. Maak 'n studie van hulle gesigte. Hulle sing uit hulle hart uit en ek kry waardering daarvoor. En ek is uitgehonger vir 'n bietjie kultuur in die vreemde.

Die Groblers is moeg en hulle kruip tussen die vere in, want môre begin ons seil.