Seilseisoen van 2016.

So vinnig is die 2016 seilseisoen verby. Dit het gekom en gegaan. Ons het 1 690 myl gevaar, 980 in Griekeland en 710 in Turkye en het 25 Griekse eilande besoek.

Ek en Gus het hierdie jaar ’n worstelstryd gevoer. Dag na dag, aand na aand. Soms het hy ons amper weggewaai, ander kere het ons voor hom weggevlug. Hy was oral. Van voor, maar meesal van agter.  

Ek het my varkies op hok gehou deur die natuur intens te beleef. Ek sien hoe die maan van niks af groei met ’n glans wat aand na aand helderder word. En ’n klimaks bereik as ’n koeëlronde vriendelike laggende bal wat jy amper met die son kan verwar.

Maan strooi die Melkweg sagkens in die see, terwyl die sterre blinkoog vanuit ligjare vêr op ons neerkyk. Dowwe berg-reuse staan stug in die water, bewakers van die aarde. En van die anker.

Ek sien hoe die dag met ’n verfkwas vol kleure verander in nag. Eers doflig, dan pienk en geel en oranje, die hele uitspansel met baldadige kleure verf … en dan is dit nag, net om môre-oggend dieselfde te doen, dog net heeltemal anders.

Ek sien hoe Gus die gladde spieël-see verander in klein rimpels en dan nog rimpels vergader om die water om te tower in rollende deinende golwe waarop wit perdjies baldadig saamry.

En dan, die wonder van my voete weer op die aarde, stewig en vas, in die arms van Moederaarde.

En Maja, dapper Maja en haar ewe dapper kaptein. Vorentoe, altyd vorentoe. Met Gus in haar bollende wit seile, met die enjin wat hipnoties prrr prrr prrr.

Ons het ook heelwat nuwe mense en ook Suid-Afrikaners ontmoet, wat ons hopelik weer sal sien.

Griekeland.

Pragtige Patmos

My geliefde Griekeland het my hierdie jaar beproef. Gus aan my ge-openbaar. Hy lyk soos ’n deurskynende lugstroom wat onsigbaar is. Ek het hom probeer liefkry, maar helaas! Sonder sukses.

Yvon en Louise, die Franse Kanadese het kom kuier. Sing-sing het hulle op Maja aangekom en ons lewens soos ’n ligte bries kom opvrolik. Die lewe was letterlik ’n lied! Hulle het ons belowe hulle gaan die fliek, Mama Mia, kyk, want ons het onder andere Skiathos en Skopelos saam met hulle beleef. Dankie, vir die heerlike kuier, julle twee.

Yvon en Louise

Elize en Fanie het saam kom kuier op Kalymnos, Pserimos, Kos, Nisyros, Tilos en Symi. Saam-saam het ons die eilande verken en Elize het ook op die Griekse Eilande verjaar. Dankie, vir die herinneringe wat ons saam kon bou. Ons sal dit nie vergeet nie. 

Fanie en Elize

Ons het saam met Martin en Shiree van Gumnuts gekuier en ons vrienskapbande het hegter geword. Sien uit daarna om hulle volgende jaar weer te sien.

Shiree en Martin

Turkye.

Die pragtige kus met my siel gelawe met meestal goeie weer. Ons het weer die Turkoois kus van die land kruis en dwars bevaar. En om nie te praat van die salige ankers nie.

Karaloz

Deon en Ryna het ons kom vereer met hulle sprankelende teenwoordigheid. Ek sê weer, Ryna het as ’n vreemdeling daar aangekom en is as my vriendin daar weg. Ons het heerlike tye saam met hulle op Maja beleef. Lekker gelag en gekuier, (ten spyte van ons groottone).

Ryna en Deon

Ons het hulle by Ayvalik ontmoet en hulle het saam geseil tot by Kuşadasi. Dankie, julle, ons het die kuier terdeë geniet.

Zafer en Nuran, ons Turkse vriende, het 500 km gery om saam met ons op Yenifoça te kuier. Met ons gebrekkige kommunikasie en handgebare en baie verduidelikings, het ons heerlike gekuier. 

Archie, ek, Nuran en Zafer

Ons het ook saam met Dee, Kevin, Lee en Larry gekuier. Heerlik saam geëet by Polemos. En by Kemer, waar Maja die jaar oorwinter, het ons die Suid-Afrikaners, Brian en Annemarie ontmoet. 

Annemarie en Brian

Nou is dit tyd om te groet. Maja is op die stelte en ons op pad huis toe. Totsiens dan, tot volgende jaar, wanneer ons weer die seile voor die wind gaan span.

Tot siens

Istanbul. Laaste dag.

30 September 2016. Vrydag.

Vandag is ons laaste dag hier in Istanbul as toeriste, want môre pak ons op en begin die terugtog huis toe.

Ons besoek die Basilika Cistern, ’n ondergrondse water reservoir, wat 527 tot 565 gebou is en kon tot 80 000 kubieke meter water stoor. Dit is 140 m lank en 70 m en het 336 kolomme.

Ondergrondse reservoir

Kolomme in die water

Huilende kolom

As jy daar loop, hoor jy die water wat so drup-drup. Daar is twee Medusa koppe in die Cistern. Daar is verskillende legendes oor haar. Volgens een was sy ’n vroulike monster van die onderwêreld. Sy het die towerkrag gehad om iemand wat na haar kyk in klip te verander.

’n Ander legende vertel dat sy ’n mooi trotse meisie met swart oë en ’n mooi liggaam was en verlief op Perseus, die seun van Zeus. Athena was ook verlief op hom en was baie jaloers op Medusa. Toe verander sy Medusa se hare in slange en almal na wie Medusa gekyk het, het in klip verander. Later het Perseus haar kop afgekap en haar krag oorgeneem. Haar koppe is onderstebo en skuins gesit, dat mense wat na haar kyk, nie in klip verander nie. Ek en Archie het darem ongeskonde daarvan afgekom.

Onderstebo Medusa

Skuinslê

 
Die Cistern is regtig iets besonders. Daarna het ons in die Gülhane Park gaan stap. Dit het ’n rustige en kalmerende invloed op mens. Die hoë boomreuse hou oor als wag en mense stap en sit in die park rond.

Gülhane Park

Keiserin Marieks

 
Ons stap langs die mure van die Topkapi Paleis huis toe. Aan die een kant is die eeu-oue mure en aan die ander kant jaag die motors verby. Oorkant is die see.

Standbeeld van Admiraal Turgut Reis by Topkapi se mure

 
Laatmiddag gaan ons na die Adamar Hotel toe en eet iets lig op hulle dak restaurant. Ons kyk uit op die Aya Sofya, die Blou Moskee en die Topkapi Paleis. Oorkant lê nog ’n deel van die reuse Istanbul. Ons geniet die verskeidenheid mezes en die uitsig. Ons sluit ons toer af op ’n “hoogtepunt”. 

Aya Sofya

Blou Moskee

Topkapi Paleis

Istanbul

 
Ons vakansie is nou amper verby. Môre is dit vir oulaas “Skipskop, Skipskop, sit jou goedjies op jou kop …” Dan gaan ons huis toe, na ’n baie deurmekaar Suid-Afrika.

Istanbul. Bosphorus.

29 September 2016. Donderdag.

Vandag doen ons die Bosphorus toer met die veerboot. Wat die vaart besonders maak, is dat Asië aan die een kant is en Europa aan die ander kant. Dis ’n dagtoer wat 10:30 begin en ongeveer 17:30 eindig. Jy vaar met die Bosphoros seestraat tot amper by die Swart See. 

Ons gaan aan boord en ons vertrek. Jare gelede het die baie ryk Ottoman hier vir hulle herehuise en piekniekplekke gebou, met die grootste swier denkbaar. Hulle is nog ongeskonde en staan trots langs die seestraat van Bosphorus. Ons is slaggereed en meer as gewillig om dit te bewonder.

 

Yeni en Sulimanye Moskees

Dolmabahçe Paleis

Ortaköy Moskee

Egiptiese Konsulaat

Rumeli Hisan - Fort van Europa

By Anadolu Kavaği, aan die Asië kant, stop ons vir middagete. Ons het ongeveer twee ure om na die kasteel toe te loop en middagete te geniet. Ons stap op opper opste na die kasteel. Anders as twee jaar gelede, is die kasteel agter slot en grendel en ons kom voor dooiemansdeur te staan. Ons stap maar na n ander uitkykpunt en kyk uit oor die Swart See (waarop ek nooit wil seil nie).
 
Ons koop elk 'n mielie vir middagete en later 'n pakkie kek (koek). Ons stap rond, kyk hier en daar en 15:00 klim ons die veerboot en vaar die pad terug.

Yoros Kasteel

Yoros Kasteel

Archie en ek met Swart See in agtergrond

Küçüksu Kasrı

Topkapi Paleis

 
Teen 17:30 meer ons vas en stap uitgeput, maar tevrede, aan land en toe takel ons die Spice Bazaar.