Ons verlaat Mandraki 13:30 en dis koud en mislik. Ons vaar 'n ent toe raak die wolke te swaar en gooi hul druppels na benede. Wat van die verrassing!?
 |
| Koud en mislik |
Ons nader Agni Baai na twee ure, 7.8 myl. Dit reën en ek gooi anker en die manne maak vas aan die pier (jetty). Dis 'n snaakse besigheid, die gevasmeerdery teen die pier. Ons maak windskeef vas, so aan die hoek van die pier en moet ook 'n tou aan die buurboot se snoet vasmaak.
 |
| Windskeef vasgemeer |
Ons sit maar in die saloon, want dis te koud buite en knibbel aan droëwors wat Dirk en Louria Luus saamgestuur het.
Ek is benoud dat die hele verrassing deur die mat gaan val, omdat dit so reën. Gaan die ander mense opdaag? Die manne weet nog van niks.
Teen 19:30 kom die eerste watertaxi daar aangejaag. Ons wip op en af in Maja en die mense klim uit en stap vinnig in die koue na die Taverna Nikolas. Ek skep moed. Net daarna kom nog 'n watertaxi aangejaag met die volgende opgewonde gaste. Ek gee die bevel: "Gaan trek aan".
 |
| First Mate en Skipper ... |
 |
| ... saam met die bemanning |
Die een na die ander watertaxi laai nog mense af en almal is klappertand-uitbundig en opgewonde. Maja wip meer en meer van al die golwe wat die taxi's agterlaat. Met 'n groot gesukkel gaan ons aan wal, want die plank is te kort, en alles beweeg.
Die geheim is uit. Ons het plek bespreek in Nikolas Taverna vir 'n tradisionele Griekse aand, met Griekse kos, musiek en danse. Dis so duur, ons begroting is nou in sy moer.
Toe begin dit. Die musikante speel, die sangeres sing en die wynkraffies word tafels toe gebring. Mense babbel jolig en die voorgereg (meze, brood en tzatziki) word aangedra. Dis heerlik. Alle koue word verdryf deur warm, vrolike harte en monde wat lag en eet en drink.
 |
| Skinkborde vol kos |
Die Grieke is 'n jolige spul en ons is nog joliger. Ons klap hande, die sangeres sing, die man speel sy bazouki uitstekend. Nog kos kom, slaai, hoender, vark en aartappels en dit raak uitbundiger. Sowat van genot het ek lanklaas gesien.
Die dansers kom te voorskyn en doen Griekse danse. Hulle bring nog wyn (dis ingesluit in die prys). Nikolas, die eienaar, doen 'n spesiale dans en jy hoor net borde breek.
 |
| Danseres saam met Leon en Dirk |
 |
| Nikolas, die eienaar |
Hoe later, hoe kwater en die gaste dans saam in 'n lang ry. Die tyd stap aan en nagereg word bedien.
 |
| Almal dans ... |
 |
| ... en geniet hulle gate uit |
Ek en Dirk dans uitspattig saam met die res van die gaste op die ritmiese maat van die musiek.
 |
| Uitgelate |
Dit word 'n aand om nooit te vergeet nie!
Hallo Julle!
ReplyDeleteAi, maar dit klink na n lekker verrassing! Het julle borde ook gegooi? Die gedans klink na n jolige, lekker affere. Ek sien sommer op die fotos hoe geniet julle dit.
Ek hoop dis weer more lekker weer.
Liefde
E xxxx
Hi.
ReplyDeleteDie dansers het borde gegooi. Dit was 'n heerlike aand.
Maggies, elke keer as ek 'n mooi plekkie tussen julle foto's sien, dink ek "ek gaan eendag DAAR bly...nee, DAAR...nee wag, DAAR....!!!" en telkens kom julle net op mooier plekke af...en ek sit in POTCH! Hellum! Ek kan nie wag nie!! En ek hoop julle het met die Griekse aand borde gegooi, want dis die enigste tyd wat mens nie daarvoor raas kry nie en ek sou die geleentheid gebruik het, hoor!! Dink net..."DIE een is vir daai skoolkind.....en DIE een is vir daai taxi.....en DIE een is vir Juliaaaas - nee wag, maak dit 4 borde vir hom...en DIE een..." . Noudat ek mooi dink - ek dink ek sou uitgejaag gewees het want hulle sou op 'n verlies uitgedraai het daai aand.... Liefde en vrede vir julle, Archies. En Dirk en Leon ook. xxA
ReplyDeleteHi.
ReplyDeleteOns voel nou dieselfde. Ons wil nou 'n villa in Gaios hê.
Net die dansers het borde gegooi, ons het nie, maar ek wou graag.
Sjoe dit lyk na n lekkerte wat mens die ritme van die musiek laat ervaar soos ek my inleef in die fotos.Rerig n fees in eie reg.Geniet julle,die bemanning se hempies lyk rerig netjies.Groete Estherxx
ReplyDeleteHi. Jy sou die ritme net so geniet het.
DeleteLyk lieflik!
ReplyDeleteHi.
DeleteOns het dit baie geniet.